[540] Dhammānudhammaṃ paṭipajjeyyāti sammāpaṭipadaṃ anulomapaṭipadaṃ apaccanīkapaṭipadaṃ anvatthapaṭipadaṃ dhammānudhammapaṭipadaṃ paṭipajjeyyāti dhammānudhammaṃ paṭipajjeyya.

[541] Gaccheyyeva jarāmaraṇassa pāranti jarāmaraṇapāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . gaccheyyeva jarāmaraṇassa pāranti pāraṃ gaccheyyeva pāraṃ adhigaccheyya pāraṃ phuseyya pāraṃ sacchikareyyāti gaccheyyeva jarāmaraṇassa pāraṃ.

[542] Pāragamanīyā ime dhammāti ime dhammā pāragamanīyā pāraṃ pāpenti pāraṃ sampāpenti pāraṃ samanupāpenti jarāmaraṇassa tāraṇāya saṃvattantīti pāragamanīyā ime dhammā.

[543] Tasmā imassa dhammapariyāyassāti [2]- tasmā taṃkāraṇā taṃhetu tappaccayā taṃnidānāti tasmā . imassa dhammapariyāyassāti imassa pārāyanassāti tasmā imassa dhammapariyāyassa.