[544] Pārāyanantveva adhivacananti pāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . āyanaṃ vuccati maggo Seyyathīdaṃ sammādiṭṭhi .pe. sammāsamādhi . adhivacananti nāmaṃ saṅkhā samaññā paññatti .pe. abhilāpoti pārāyanantveva adhivacanaṃ .

[545] Ajito tissametteyyo puṇṇako atha mettagū dhotako upasīvo ca nando ca atha hemako todeyyakappā dubhayo jatukaṇṇī ca paṇḍito bhadrāvudho udayo ca posālo cāpi brāhmaṇo mogharājā ca medhāvī piṅgiyo ca mahāisi ete buddhaṃ upāgañchuṃ sampannacaraṇaṃ isiṃ pucchantā nipuṇe pañhe buddhaseṭṭhaṃ upāgamuṃ.

[546] Ete buddhaṃ upāgañchunti eteti [2]- brāhmaṇā. Buddhanti yo so bhagavā sayambhū anācariyako pubbe ananussutesu dhammesu sāmaṃ saccāni abhisambujjhi tattha ca sabbaññutaṃ patto balesu ca vasībhāvaṃ . buddhoti kenatthena buddho . bujjhitā saccānīti buddho . bodhetā pajāyāti buddho . sabbaññutāya buddho . sabbadassāvitāya buddho . abhiññeyyatāya buddho . Vikasitāya buddho . khīṇāsavasaṅkhātena buddho . nirupakkilesasaṅkhātena buddho . ekantavītarāgoti buddho . ekantavītadosoti buddho . ekantavītamohoti buddho . ekantanikkilesoti buddho . Ekāyanamaggaṃ gatoti buddho . eko anuttaraṃ sammāsambodhiṃ Abhisambuddhoti buddho . abuddhivihatattā buddhipaṭilābhā buddho . Buddhoti netaṃ nāmaṃ mātarā kataṃ na pitarā kataṃ na bhātarā kataṃ na bhaginiyā kataṃ na mittāmaccehi kataṃ na ñātisālohitehi kataṃ na samaṇabrāhmaṇehi kataṃ na devatāhi kataṃ vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ buddhoti buddhaṃ . ete buddhaṃ upāgañchunti ete buddhaṃ upāgamiṃsu upasaṅkamiṃsu payirupāsiṃsu paripucchiṃsu paripañhiṃsūti ete buddhaṃ upāgañchuṃ.