[547] Sampannacaraṇaṃ isinti caraṇaṃ vuccati sīlācāranipphatti . Sīlasaṃvaropi caraṇaṃ indriyasaṃvaropi caraṇaṃ bhojane mattaññutāpi caraṇaṃ jāgariyānuyogopi caraṇaṃ sattapi saddhammā caraṇaṃ cattāripi jhānāni caraṇaṃ . sampannacaraṇanti sampannacaraṇaṃ seṭṭhacaraṇaṃ [1]- Pāmokkhacaraṇaṃ uttamacaraṇaṃ pavaracaraṇanti sampannacaraṇaṃ . Isinti isi . bhagavā mahantaṃ sīlakkhandhaṃ esi gavesi pariyesīti isi .pe. mahesakkhehi vā sattehi esito gavesito pariyesito kahaṃ buddho kahaṃ bhagavā kahaṃ devadevo kahaṃ narāsabhoti isīti sampannacaraṇaṃ isiṃ.

[548] Pucchantā nipuṇe pañheti pucchantāti pucchantā yācantā ajjhesantā pasādentā . nipuṇe pañheti gambhīre duddase duranubodhe sante paṇīte atakkāvacare nipuṇe paṇḍitavedanīye Pañheti pucchantā nipuṇe pañhe.

[549] Buddhaseṭṭhaṃ upāgamunti buddhāti yo so bhagavā .pe. Sacchikā paññatti yadidaṃ buddhoti . seṭṭhanti aggaṃ seṭṭhaṃ viseṭṭhaṃ pāmokkhaṃ uttamaṃ pavaranti buddhaseṭṭhaṃ . upāgamunti upāgamiṃsu upasaṅkamiṃsu payirupāsiṃsu paripucchiṃsu paripañhiṃsūti buddhaseṭṭhaṃ upāgamuṃ. Tenetaṃ vuccati ete buddhaṃ upāgañchuṃ sampannacaraṇaṃ isiṃ pucchantā nipuṇe pañhe buddhaseṭṭhaṃ upāgamunti.

[550] Tesaṃ buddho byākāsi pañhaṃ puṭṭho yathātathaṃ pañhānaṃ veyyākaraṇena tosesi brāhmaṇe muni.