[551] Tesaṃ buddho byākāsīti tesanti soḷasannaṃ pārāyaniyānaṃ brāhmaṇānaṃ . buddhoti yo so bhagavā .pe. Sacchikā paññatti yadidaṃ buddhoti . byākāsīti tesaṃ buddho byākāsi ācikkhi desesi paññapesi paṭṭhapesi vivari vibhaji uttānīmakāsi pakāsesīti tesaṃ buddho byākāsi.

[552] Pañhaṃ puṭṭho yathātathanti pañhaṃ puṭṭhoti pañhaṃ pucchito yācito ajjhesito pasādito . yathātathanti yathā ācikkhitabbaṃ tathā ācikkhi yathā desitabbaṃ tathā desesi yathā paññapetabbaṃ tathā paññapesi yathā paṭṭhapetabbaṃ tathā paṭṭhapesi yathā vivaritabbaṃ tathā vivari yathā vibhajitabbaṃ tathā vibhaji yathā Uttānīkātabbaṃ tathā uttānīmakāsi yathā pakāsetabbaṃ tathā pakāsesīti pañhaṃ puṭṭho yathātathaṃ.

[553] Pañhānaṃ veyyākaraṇenāti pañhānaṃ veyyākaraṇena ācikkhaṇena desanena paññapanena paṭṭhapanena vivarena vibhajanena uttānīkammena pakāsanenāti pañhānaṃ veyyākaraṇena.

[554] Tosesi brāhmaṇe munīti tosesīti tosesi vitosesi pasādesi ārādhesi attamane akāsi . brāhmaṇeti soḷasa pārāyaniye brāhmaṇe . munīti monaṃ vuccati ñāṇaṃ yā paññā pajānanā .pe. saṅgajālamaticca so munīti tosesi brāhmaṇe muni. Tenetaṃ vuccati tesaṃ buddho byākāsi pañhaṃ puṭṭho yathātathaṃ pañhānaṃ veyyākaraṇena tosesi brāhmaṇe munīti.