[563] Tathā yo paṭipajjeyyāti sammāpaṭipadaṃ anulomapaṭipadaṃ apaccanīkapaṭipadaṃ anvatthapaṭipadaṃ dhammānudhammapaṭipadaṃ paṭipajjeyyāti tathā yo paṭipajjeyya.

[564] Gacche pāraṃ apāratoti pāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . apāraṃ vuccanti kilesā ca khandhā ca abhisaṅkhārā ca . gacche pāraṃ apāratoti apārato pāraṃ gaccheyya pāraṃ adhigaccheyya pāraṃ phuseyya pāraṃ sacchikareyyāti gacche pāraṃ apārato . Tenetaṃ vuccati ekamekassa pañhassa yathā buddhena desitaṃ tathā yo paṭipajjeyya gacche pāraṃ apāratoti.

[565] Apārā pāraṃ gaccheyya bhāvento maggamuttamaṃ Maggo so pāragamanāya tasmā pārāyanaṃ iti.

[566] Apārā pāraṃ gaccheyyāti apāraṃ vuccanti kilesā ca khandhā ca abhisaṅkhārā ca . pāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . apārā pāraṃ gaccheyyāti apārā pāraṃ gaccheyya pāraṃ adhigaccheyya pāraṃ phuseyya pāraṃ sacchikareyyāti apārā pāraṃ gaccheyya.