[567] Bhāvento maggamuttamanti magganti maggo vuccati ariyo aṭṭhaṅgiko maggo seyyathīdaṃ sammādiṭṭhi .pe. Sammāsamādhi . uttamanti aggaṃ seṭṭhaṃ viseṭṭhaṃ pāmokkhaṃ uttamaṃ pavaranti maggamuttamaṃ . bhāventoti bhāvento āsevanto bahulīkarontoti bhāvento maggamuttamaṃ.

[568] Maggo so pāragamanāyāti maggo pantho patho pajjo añjasaṃ vaṭumāyanaṃ nāvā uttarasetu [3]- pakullo [3]- saṅkamo . Pāragamanāyāti pāragamanāya pārasampāpanāya pārasamanupāpanāya jarāmaraṇassa taraṇāyāti maggo so pāragamanāya.

[569] Tasmā pārāyanaṃ itīti [5]- tasmā taṃkāraṇā taṃhetu tappaccayā taṃnidānā . pāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . āyanaṃ vuccati maggo . itīti padasandhi .pe. Padānupubbakametaṃ itīti tasmā pārāyanaṃ iti. Tenetaṃ vuccati apārā pāraṃ gaccheyya bhāvento maggamuttamaṃ maggo so pāragamanāya tasmā pārāyanaṃ itīti.

[570] Pārāyanamanugāyissaṃ (iccāyasmā piṅgiyo) (yathā addakkhi tathā akkhāsi) vimalo bhūrimedhaso nikkāmo nibbano nāgo kissa hetu musā bhaṇe.