[571] Pārāyanamanugāyissanti gītamanugāyissaṃ kathitamanugāyissaṃ lapitamanugāyissaṃ bhāsitamanugāyissanti pārāyanamanugāyissaṃ . Iccāyasmā piṅgayoti iccāti padasandhi .pe. padānupubbakametaṃ iccāti . āyasmāti piyavacanaṃ garuvacanaṃ sagāravasappatissādhivacanametaṃ āyasmāti . piṅgiyoti tassa therassa nāmaṃ saṅkhā samaññā paññatti vohāro nāmaṃ nāmakammaṃ nāmadheyyaṃ nirutti byañjanaṃ abhilāpoti iccāyasmā piṅgiyo.

[572] Yathā addakkhi tathā akkhāsīti yathā addakkhi tathā akkhāsi ācikkhi desesi paññapesi paṭṭhapesi vivari vibhaji uttānīmakāsi pakāsesi sabbe saṅkhārā aniccāti .pe. yaṅkiñci samudayadhammaṃ sabbantaṃ nirodhadhammanti yathā addakkhi tathā akkhāsi ācikkhi desesi paññapesi paṭṭhapesi vivari vibhaji uttānīmakāsi Pakāsesīti yathā addakkhi tathā akkhāsi.

[573] Vimalo bhūrimedhasoti vimaloti rāgo malaṃ doso malaṃ moho malaṃ kodho malaṃ upanāho malaṃ .pe. sabbākusalābhisaṅkhārā malā . te malā buddhassa bhagavato pahīnā ucchinnamūlā tālāvatthukatā anabhāvaṅgatā āyatiṃ anuppādadhammā tasmā buddho amalo vimalo nimmalo malāpagato malavippahīno malavippamutto sabbamalavītivatto . bhūri vuccati paṭhavī . bhagavā imāya paṭhavīsamāya vipulāya vitthatāya paññāya samannāgato . medhā vuccati paññā yā paññā pajānanā .pe. amoho dhammavicayo sammādiṭṭhi . bhagavā imāya medhāya paññāya upeto samupeto upāgato samupāgato upapanno samupapanno samannāgato tasmā buddho bhūrimedhasoti vimalo bhūrimedhaso.

[574] Nikkāmo nibbano nāgoti kāmāti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. ime vuccanti kilesakāmā . buddhassa bhagavato vatthukāmā pariññātā kilesakāmā pahīnā . vatthukāmānaṃ pariññātattā kilesakāmānaṃ pahīnattā bhagavā na kāme kāmeti [3]- na kāme pattheti na kāme piheti na kāme abhijappati. Ye kāme kāmenti [4]- kāme patthenti kāme pihayanti kāme abhijappanti te kāmakāmino rāgarāgino saññasaññino . bhagavā na kāme kāmeti Na kāme pattheti na kāme piheti na kāme abhijappati tasmā buddho akāmo nikkāmo cattakāmo vantakāmo muttakāmo pahīnakāmo paṭinissaṭṭhakāmo vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhapaṭisaṃvedī brahmabhūtena attanā viharatīti nikkāmo . Nibbanoti rāgo vanaṃ doso vanaṃ moho vanaṃ kodho vanaṃ upanāho vanaṃ .pe. sabbākusalābhisaṅkhārā vanā . te vanā buddhassa bhagavato pahīnā ucchinnamūlā tālāvatthukatā anabhāvaṅgatā āyatiṃ anuppādadhammā tasmā buddho avano nibbano vanāpagato vanavippahīno vanavippamutto sabbavanavītivattoti nibbano . nāgoti bhagavā āguṃ na karotīti nāgo . na gacchatīti nāgo . na āgacchatīti nāgo .pe. evaṃ bhagavā na āgacchatīti nāgoti nikkāmo nibbano nāgo.