[583] Anāsavo sabbadukkhappahīnoti anāsavoti cattāro āsavā kāmāsavo bhavāsavo diṭṭhāsavo avijjāsavo . te āsavā buddhassa bhagavato pahīnā ucchinnamūlā tālāvatthukatā anabhāvaṅgatā āyatiṃ anuppādadhammā tasmā buddho anāsavo . sabbadukkhappahīnoti sabbaṃ tassa paṭisandhikaṃ jātidukkhaṃ jarādukkhaṃ byādhidukkhaṃ maraṇadukkhaṃ Sokaparidevadukkhadomanassupāyāsadukkhaṃ .pe. diṭṭhibyasanadukkhaṃ pahīnaṃ samucchinnaṃ paṭippassaddhaṃ abhabbuppattikaṃ ñāṇagginā daḍḍhaṃ tasmā buddho sabbadukkhappahīnoti anāsavo sabbadukkhappahīno.

[584] Saccavhayo brahmupāsito meti saccavhayoti [1]- saccasadisavhayo . vipassī bhagavā sikhī bhagavā vessabhū bhagavā kakusandho bhagavā konāgamano bhagavā kassapo bhagavā [2]- buddhā bhagavanto sadisanāmā saccasadisavhayā . bhagavā sakyamuni tesaṃ buddhānaṃ bhagavantānaṃ sadisanāmo saccasadisavhayoti tasmā buddho saccavhayo. Brahmupāsito meti so bhagavā mayā āsito upāsito payirupāsito paripucchito paripañhitoti saccavhayo brahmupāsito me . Tenāha piṅgiyatthero tamonudo buddho samantacakkhu lokantagū sabbabhavātivatto anāsavo sabbadukkhappahīno saccavhayo brahmupāsito meti.

[585] Dijo yathā kubbanakaṃ pahāya bahupphalaṃ kānanaṃ āvaseyya evamāhaṃ appadasse pahāya mahodadhiṃ haṃsarivajjhapatto .

[586] Dijo yathā kubbanakaṃ pahāya bahupphalaṃ kānanaṃ Āvaseyyāti dijo vuccati pakkhī . kiṃkāraṇā dijo vuccati pakkhī . Dvikkhattuṃ jāyati dijo mātukucchimhā ca aṇḍakosamhā ca taṃkāraṇā dijo vuccati pakkhīti dijo . yathā kubbanakaṃ pahāyāti yathā dijo kubbanakaṃ rittavanakaṃ appabhakkhaṃ appodakaṃ pahāya jahitvā atikkamitvā [3]- vītivattetvā aññaṃ bahupphalaṃ bahubhakkhaṃ bahurukkhaṃ mahantaṃ kānanaṃ vanasaṇḍaṃ adhigaccheyya vindeyya paṭilabheyya tasmiṃ [5]- vanasaṇḍe vāsaṃ kappeyyāti dijo yathā kubbanakaṃ pahāya bahupphalaṃ kānanaṃ āvaseyya.