[587] Evamāhaṃ appadasse pahāya mahodadhiṃ haṃsarivajjhapattoti evanti opammasampaṭipādanaṃ . appadasse pahāyāti yo ca bāvarī brāhmaṇo ye caññe tassa ācariyā buddhaṃ bhagavantaṃ upādāya appadassā parittadassā thokadassā omakadassā lāmakadassā jatukkadassā . te brāhmaṇe appadasse parittadasse thokadasse omakadasse lāmakadasse jatukkadasse pahāya pajahitvā atikkamitvā samatikkamitvā [6]- buddhaṃ bhagavantaṃ [7]- aggadassaṃ seṭṭhadassaṃ viseṭṭhadassaṃ [8]- uttamadassaṃ pavaraṃ asamaṃ asamasamaṃ [10]- appaṭibhāgaṃ appaṭipuggalaṃ devātidevaṃ narāsabhaṃ purisasīhaṃ purisanāgaṃ purisājaññaṃ purisanisabhaṃ purisadhorayhaṃ dasabalaṃ tādiṃ adhigacchiṃ vindiṃ paṭilabhiṃ. {587.1} Yathāva haṃso mahantaṃ mānusakataṃ vā saraṃ anotattaṃ vā dahaṃ mahāsamuddaṃ vā akkhobbhaṃ amitodakaṃ [15]- adhigaccheyya vindeyya paṭilabheyya Evameva piṅgiyo brāhmaṇo buddhaṃ bhagavantaṃ akkhobbhaṃ amitatejaṃ pabhinnañāṇaṃ vivaṭacakkhuṃ paññāpabhedakusalaṃ adhigatapaṭisambhidaṃ catuvesārajjappattaṃ suddhādhimuttaṃ setapaccattaṃ advayabhāṇiṃ tādiṃ tathāpaṭiññaṃ aparittaṃ mahantaṃ gambhīraṃ appameyyaṃ duppariyogāḷhaṃ bahuratanaṃ sāgarasamaṃ chaḷaṅgupekkhāya samannāgataṃ atulaṃ vipulaṃ appameyyaṃ taṃ tādisaṃ pavadatamaggavādinaṃ sinerumiva nagānaṃ garuḷamiva dijānaṃ sīhamiva migānaṃ udadhimiva aṇṇavānaṃ jinapavaraṃ adhigacchiṃ vindiṃ paṭilabhinti evamāhaṃ appadasse pahāya mahodadhiṃ haṃsarivajjhapatto . Tenāha piṅgiyatthero dijo yathā kubbanakaṃ pahāya bahupphalaṃ kānanaṃ āvaseyya evamāhaṃ appadasse pahāya mahodadhiṃ haṃsarivajjhapattoti.