[596] Jutimā so pabhaṅkaroti jutimāti jutimā [1]- paṇḍito paññavā buddhimā ñāṇī vibhāvī medhāvī . Pabhaṅkaroti [2]- ālokakaro obhāsakaro dīpaṅkaro [3]- ujjotakaro pajjotakaroti jutimā so pabhaṅkaro.

[597] Gotamo bhūripaññāṇoti gotamo bhūripaññāṇo ñāṇapaññāṇo paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanadhammo vibhūtavihārī taccarito tabbahulo taggaruko tanninno tappoṇo tappabbhāro tadadhimutto tadādhipateyyo . Dhajo rathassa paññāṇaṃ dhumo paññāṇamaggino rājā raṭṭhassa paññāṇaṃ bhattā paññāṇamitthiyāti. Evameva gotamo bhūripaññāṇo ñāṇapaññāṇo paññādhajo Paññāketu paññādhipateyyo vicayabahulo pavicayabahulo okkhāyanabahulo samokkhāyanadhammo vibhūtavihārī taccarito tabbahulo taggaruko tanninno tappoṇo tappabbhāro tadadhimutto tadādhipateyyoti gotamo bhūripaññāṇo.

[598] Gotamo bhūrimedhasoti bhūri vuccati paṭhavī. [1]- Paṭhavīsamāya vipulāya vitthatāya paññāya samannāgato . medhā vuccati paññā yā paññā pajānanā .pe. amoho dhammavicayo sammādiṭṭhi . Bhagavā imāya medhāya paññāya upeto samupeto upāgato samupāgato upapanno samupapanno samannāgato tasmā buddho bhūrimedhasoti gotamo bhūrimedhaso. Tenāha piṅgiyatthero eko tamanudāsīno jutimā so pabhaṅkaro gotamo bhūripaññāṇo gotamo bhūrimedhasoti.

[599] Yo me dhammamadesesi sandiṭṭhikamakālikaṃ taṇhakkhayamanītikaṃ yassa natthi upamā kvaci.