[608] Gotamā bhūrimedhasāti bhūri vuccati paṭhavī . bhagavā Imāya paṭhavīsamāya vipulāya vitthatāya paññāya samannāgato. {608.1} Medhā vuccati paññā yā paññā pajānanā .pe. Amoho dhammavicayo sammādiṭṭhi . bhagavā imāya medhāya paññāya upeto samupeto upāgato samupāgato upapanno samupapanno samannāgato tasmā buddho bhūrimedhasoti gotamā bhūrimedhasā . tenāha so bāvarī brāhmaṇo kinnu tamhā vippavasasi muhuttamapi piṅgiya gotamā bhūripaññāṇā gotamā bhūrimedhasāti.

[609] Yo te dhammamadesesi sandiṭṭhikamakālikaṃ taṇhakkhayamanītikaṃ yassa natthi upamā kvaci.

[610] Yo te dhammamadesesīti yoti yo so bhagavā .pe. Tattha ca sabbaññutaṃ patto balesu ca vasībhāvaṃ . dhammamadesesīti dhammanti ādikalyāṇaṃ .pe. nibbānagāminiñca paṭipadaṃ ācikkhi desesi paññapesi paṭṭhapesi vivari vibhaji uttānīmakāsi pakāsesīti yo te dhammamadesesi.

[611] Sandiṭṭhikamakālikanti sandiṭṭhikaṃ akālikaṃ ehipassikaṃ opanayikaṃ paccattaṃ veditabbaṃ viññūhīti evaṃ sandiṭṭhikamakālikaṃ . Athavā yo diṭṭheva dhamme ariyaṃ aṭṭhaṅgikaṃ maggaṃ bhāveti tassa maggassa anantarā samanantarā adhigacchateva phalaṃ vindati paṭilabhatīti evampi sandiṭṭhikamakālikaṃ . [3]- yathā manussā kālikaṃ dhanaṃ Datvā anantarā na labhanti kālaṃ āgamenti nevāyaṃ dhammo . Yo diṭṭheva dhamme ariyaṃ aṭṭhaṅgikaṃ maggaṃ bhāveti tassa maggassa anantarā samanantarā adhigacchateva phalaṃ vindati paṭilabhati na parattha na paraloke evaṃ akālikanti sandiṭṭhikamakālikaṃ.