[612] Taṇhakkhayamanītikanti taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā . taṇhakkhayanti taṇhakkhayaṃ rāgakkhayaṃ dosakkhayaṃ mohakkhayaṃ gatikkhayaṃ upapattikkhayaṃ paṭisandhikkhayaṃ bhavakkhayaṃ saṃsārakkhayaṃ vaṭṭakkhayaṃ . anītikanti īti vuccanti kilesā ca khandhā ca abhisaṅkhārā ca . ītippahānaṃ ītivūpasamo ītipaṭinissaggo ītipaṭippassaddhi amataṃ nibbānanti taṇhakkhayamanītikaṃ.

[613] Yassa natthi upamā kvacīti yassāti nibbānassa . Natthi upamāti upamā natthi upanidhā natthi sadisaṃ natthi paṭibhāgo natthi na saṃvijjati nupalabbhatīti natthi upamā . kvacīti kvaci kimhici katthaci ajjhattaṃ vā bahiddhā vā ajjhattabahiddhā vāti yassa natthi upamā kvaci. Tenāha so bāvarī brāhmaṇo yo te dhammamadesesi sandiṭṭhikamakālikaṃ taṇhakkhayamanītikaṃ yassa natthi upamā kvacīti.

[614] Nāhaṃ tamhā vippavasāmi muhuttamapi brāhmaṇa gotamā bhūripaññāṇā gotamā bhūrimedhasā.

[615] Nāhaṃ tamhā vippavasāmīti ahaṃ tamhā buddhamhā na vippavasāmi na apemi na apagacchāmi na vinā homīti nāhaṃ tamhā vippavasāmi.