[616] Muhuttamapi brāhmaṇāti muhuttampi khaṇampi layampi vassampi atthampīti muhuttamapi . brāhmaṇāti gāravena mātulaṃ ālapati.

[617] Gotamā bhūripaññāṇāti gotamā bhūripaññāṇā ñāṇapaññāṇā paññādhajā paññāketumhā paññādhipateyyamhā vicayabahulā pavicayabahulā okkhāyanabahulā samokkhāyanadhammā vibhūtavihārimhā taccaritā tabbahulā taggarukā tanninnā tappoṇā tappabbhārā tadadhimuttā tadādhipateyyamhāti gotamā bhūripaññāṇā.

[618] Gotamā bhūrimedhasāti bhūri vuccati paṭhavī . bhagavā imāya paṭhavīsamāya vipulāya vitthatāya paññāya samannāgato . Medhā vuccati paññā yā paññā pajānanā .pe. amoho dhammavicayo sammādiṭṭhi . bhagavā imāya medhāya paññāya upeto samupeto upāgato samupāgato upapanno samupapanno samannāgato tasmā buddho bhūrimedhasoti gotamā bhūrimedhasā. Tenāha piṅgiyatthero nāhaṃ tamhā vippavasāmi muhuttamapi brāhmaṇa gotamā bhūripaññāṇā gotamā bhūrimedhasāti.

[619] Yo me dhammamadesesi sandiṭṭhikamakālikaṃ Taṇhakkhayamanītikaṃ yassa natthi upamā kvaci.