[620] Yo me dhammamadesesīti yoti yo so bhagavā sayambhū anācariyako pubbe ananussutesu dhammesu sāmaṃ saccāni abhisambujjhi tattha ca sabbaññutaṃ patto balesu ca vasībhāvaṃ . Dhammamadesesīti dhammanti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ nibbānañca nibbānagāminiñca paṭipadaṃ ācikkhi desesi paññapesi paṭṭhapesi vivari vibhaji uttānīmakāsi pakāsesīti yo me dhammamadesesi.

[621] Sandiṭṭhikamakālikanti sandiṭṭhikaṃ akālikaṃ ehipassikaṃ opanayikaṃ paccattaṃ veditabbaṃ viññūhīti evaṃ sandiṭṭhikamakālikaṃ . Athavā yo diṭṭheva dhamme ariyaṃ aṭṭhaṅgikaṃ maggaṃ bhāveti tassa maggassa anantarā samanantarā adhigacchateva phalaṃ vindati paṭilabhatīti evampi sandiṭṭhikamakālikaṃ . yathā manussā kālikaṃ dhanaṃ datvā anantarā na labhanti kālaṃ āgamenti nevāyaṃ dhammo . yo diṭṭheva dhamme ariyaṃ aṭṭhaṅgikaṃ maggaṃ bhāveti tassa maggassa anantarā samanantarā adhigacchateva phalaṃ vindati paṭilabhati na parattha na paraloke evaṃ akālikanti sandiṭṭhikamakālikaṃ.

[622] Taṇhakkhayamanītikanti taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā . taṇhakkhayanti taṇhakkhayaṃ rāgakkhayaṃ dosakkhayaṃ mohakkhayaṃ gatikkhayaṃ upapattikkhayaṃ paṭisandhikkhayaṃ bhavakkhayaṃ saṃsārakkhayaṃ vaṭṭakkhayaṃ . anītikanti īti vuccanti kilesā ca khandhā ca abhisaṅkhārā ca . ītippahānaṃ ītivūpasamo ītipaṭinissaggo ītipaṭippassaddhi amataṃ nibbānanti taṇhakkhayamanītikaṃ.

[623] Yassa natthi upamā kvacīti yassāti nibbānassa . Natthi upamāti upamā natthi upanidhā natthi sadisaṃ natthi paṭibhāgo natthi na saṃvijjati nupalabbhatīti natthi upamā . kavacīti kvaci kimhici katthaci ajjhattaṃ vā bahiddhā vā ajjhattabahiddhā vāti yassa natthi upamā kvaci. Tenāha piṅgiyatthero yo me dhammamadesesi sandiṭṭhikamakālikaṃ taṇhakkhayamanītikaṃ yassa natthi upamā kvacīti.