[624] Passāmi naṃ manasā cakkhunāva rattindivaṃ brāhmaṇa appamatto namassamāno vivasāmi rattiṃ teneva maññāmi avippavāsaṃ.

[625] Passāmi naṃ manasā cakkhunāvāti yathā cakkhumā puriso ālokeyya rūpagatāni passeyya dakkheyya olokeyya Nijjhāpeyya upaparikkheyya evamevāhaṃ buddhaṃ bhagavantaṃ manasā passāmi dakkhāmi olokemi nijjhāpayāmi upaparikkhāmīti passāmi naṃ manasā cakkhunāva.

[626] Rattindivaṃ brāhmaṇa appamattoti rattiñca divā ca [1]- manasā bhāvento appamattoti rattindivaṃ brāhmaṇa appamatto.

[627] Namassamāno vivasāmi rattinti namassamānoti kāyena vā namassamāno vācāya vā namassamāno cittena vā namassamāno anvatthapaṭipattiyā vā namassamāno dhammānudhammapaṭipattiyā vā namassamāno sakkāramāno garukāramāno mānayamāno pūjayamāno rattindivaṃ vasāmi vītināmemīti namassamāno vivasāmi rattiṃ.