[628] Teneva maññāmi avippavāsanti tāya buddhānussatiyā bhāvento avippavāsoti taṃ maññāmi avippavuṭṭhoti taṃ maññāmi jānāmi evaṃ jānāmi evaṃ ājānāmi evaṃ vijānāmi evaṃ paṭivijānāmīti [3]- teneva maññāmi avippavāsaṃ. Tenāha piṅgiyatthero passāmi naṃ manasā cakkhunāva rattindivaṃ brāhmaṇa appamatto namassamāno vivasāmi rattiṃ teneva maññāmi avippavāsanti.

[629] Saddhā ca pīti ca mano sati ca Nāmentime gotamasāsanamhā yaṃ yaṃ disaṃ vajjati bhūripañño sa tena teneva natohamasmi.

[630] Saddhā ca pīti ca mano sati cāti saddhāti yā ca bhagavantaṃ ārabbha saddhā saddahanā okappanā abhippasādo saddhā saddhindriyaṃ saddhābalaṃ . pītīti yā ca bhagavantaṃ ārabbha pīti pāmujjaṃ modanā pamodanā vitti odagyaṃ attamanatā atippasādanatā cittassa . manoti yañca bhagavantaṃ ārabbha cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu . satīti yā ca bhagavantaṃ ārabbha sati anussati .pe. Sammāsatīti saddhā ca pīti ca mano sati ca.

[631] Nāmentime gotamasāsanamhāti ime cattāro dhammā gotamasāsanā buddhasāsanā jinasāsanā tathāgatasāsanā arahantasāsanā nāmenti nāgacchanti na vijahanti na vināsentīti nāmentime gotamasāsanamhā.