[632] Yaṃ yaṃ disaṃ vajjati bhūripaññoti yaṃ yaṃ disanti puratthimaṃ vā disaṃ pacchimaṃ vā disaṃ dakkhiṇaṃ vā disaṃ uttaraṃ vā disaṃ vajati gacchati kamati atikkamati . bhūripaññoti bhūripañño mahāpañño tikkhapañño puthupañño hāsapañño javanapañño Nibbedhikapaññoti [1]- yaṃ yaṃ disaṃ vajjati bhūripañño.

[633] Sa tena teneva natohamasmīti so yena buddho tena teneva nato tanninno tappoṇo tappabbhāro tadadhimutto tadādhipateyyoti sa tena teneva natohamasmi . tenāha piṅgiyatthero saddhā ca pīti ca mano sati ca nāmentime gotamasāsanamhā yaṃ yaṃ disaṃ vajjati bhūripañño sa tena teneva natohamasmīti.

[634] Jiṇṇassa me dubbalathāmakassa teneva kāyo na paleti tattha saṅkappayantāya vajāmi niccaṃ mano hi me brāhmaṇa tena yutto.

[635] Jiṇṇassa me dubbalathāmakassāti jiṇṇassāti jiṇṇassa vuḍḍhassa mahallakassa addhagatassa vayoanuppattassāti jiṇṇassa . dubbalathāmakassāti dubbalathāmakassa appathāmakassa parittathāmakassāti jiṇṇassa me dubbalathāmakassa.