[636] Teneva kāyo na paleti tatthāti kāyo yena buddho tena na paleti na vajati na gacchati nābhikkamatīti teneva kāyo na paleti tattha.

[637] Saṅkappayantāya vajāmi niccanti saṅkappagamanena vitakkagamanena ñāṇagamanena paññāgamanena buddhigamanena vajāmi gacchāmi abhikkamāmīti saṅkappayantāya vajāmi niccaṃ.

[638] Mano hi me brāhmaṇa tena yuttoti manoti yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu . brāhmaṇa tena yuttoti mano mama yena buddho tena yutto [2]- saṃyuttoti mano hi me brāhmaṇa tena yutto. Tenāha piṅgiyatthero jiṇṇassa me dubbalathāmakassa teneva kāyo na paleti tattha saṅkappayantāya vajāmi niccaṃ mano hi me brāhmaṇa tena yuttoti.

[639] Paṅke sayāno pariphandamāno dīpā dīpaṃ upallaviṃ athaddasāsiṃ sambuddhaṃ oghatiṇṇamanāsavaṃ.