[641] Dīpā dīpaṃ upallavinti satthārato satthāraṃ dhammakkhānato dhammakkhānaṃ gaṇato gaṇaṃ diṭṭhiyā diṭṭhiṃ paṭipadāto paṭipadaṃ maggato maggaṃ [4]- upallaviṃ samupallavinti dīpā dīpaṃ upallaviṃ.

[642] Athaddasāsiṃ sambuddhanti athāti padasandhi .pe. Padānupubbakametaṃ athāti . addasāsinti addasaṃ addakkhiṃ apassiṃ paṭivijjhiṃ . sambuddhanti yo so bhagavā .pe. sacchikā paññatti yadidaṃ buddhoti athaddasāsiṃ sambuddhaṃ.

[643] Oghatiṇṇanti bhagavā kāmoghaṃ tiṇṇo bhavoghaṃ tiṇṇo Diṭṭhoghaṃ tiṇṇo avijjoghaṃ tiṇṇo [1]- uttiṇṇo nittiṇṇo atikkanto samatikkanto vītivatto so vuṭṭhavāso ciṇṇacaraṇo .pe. Jātijarāmaraṇasaṃsāro natthi tassa punabbhavoti oghatiṇṇaṃ . Anāsavanti cattāro āsavā kāmāsavo bhavāsavo diṭṭhāvaso avijjāsavo . te āsavā buddhassa bhagavato pahīnā ucchinnamūlā tālāvatthukatā anabhāvaṅgatā āyatiṃ anuppādadhammā tasmā buddho anāsavoti oghatiṇṇamanāsavaṃ. Tenāha piṅgiyatthero paṅke sayāno pariphandamāno dīpā dīpaṃ upallaviṃ athaddasāsiṃ sambuddhaṃ oghatiṇṇamanāsavanti.

[644] Yathā ahū vakkali muttasaddho bhadrāvudho āḷavigotamo ca evameva tvampi pamuñcassu saddhaṃ gamissasi (tvaṃ) piṅgiya maccudheyyassa pāraṃ.