[645] Yathā ahū vakkali muttasaddho bhadrāvudho āḷavigotamo cāti yathā vakkali muttasaddho saddhāgaruko saddhāpubbaṅgamo saddhādhimutto saddhādhipateyyo arahattappatto yathā bhadrāvudho [3]- muttasaddho saddhāgaruko saddhāpubbaṅgamo saddhādhimutto saddhādhipateyyo arahattappatto yathā āḷavigotamo [3]- muttasaddho Saddhāgaruko saddhāpubbaṅgamo saddhādhimutto saddhādhipateyyo arahattappattoti yathā ahū vakkali muttasaddho bhadrāvudho āḷavigotamo ca.

[646] Evameva tvampi pamuñcassu saddhanti evameva tvaṃ saddhaṃ muñcassu pamuñcassu sampamuñcassu adhimuñcassu okappehi sabbe saṅkhārā aniccāti .pe. yaṅkiñci samudayadhammaṃ sabbantaṃ nirodhadhammanti saddhaṃ muñcassu pamuñcassu sampamuñcassu adhimuñcassu okappehīti evameva tvampi pamuñcassu saddhaṃ.

[647] Gamissasi (tvaṃ) piṅgiya maccudheyyassa pāranti maccudheyyā vuccanti kilesā ca khandhā ca abhisaṅkhārā ca. Maccudheyyassa pāraṃ vuccati amataṃ nibbānaṃ yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ . gamissasi (tvaṃ) piṅgiya maccudheyyassa pāranti tvaṃ pāraṃ gamissasi [2]- adhigamissasi [2]- phusissasi [2]- sacchikarissasīti gamissasi (tvaṃ) piṅgiya maccudheyyassa pāraṃ. Tenāha bhagavā yathā ahū vakkali muttasaddho bhadrāvudho āḷavigotamo ca evameva tvampi pamuñcassu saddhaṃ gamissasi (tvaṃ) piṅgiya maccudheyyassa pāranti.

[648] Esa bhiyyo pasīdāmi sutvāna munino vaco Vivaṭacchado sambuddho akhilo paṭibhāṇavā .