[653] Adhideve abhiññāya sabbaṃ vedi parovaraṃ pañhānantakaro satthā kaṅkhīnaṃ paṭijānataṃ.

[654] Adhideve abhiññāyāti devāti tayo devā sammatidevā ca upapattidevā ca visuddhidevā ca. {654.1} Katame sammatidevā. [2]- Rājāno ca rājakumārā ca deviyo ca ime sammatidevā vuccanti. {654.2} Katame upapattidevā . [3]- Cātummahārājikā devā tāvatiṃsā devā .pe. brahmakāyikā devā ye ca devā tatrupari ime upapattidevā vuccanti. {654.3} Katame visuddhidevā . [5]- tathāgatasāvakā arahanto khīṇāsavā ye ca paccekasambuddhā ime visuddhidevā vuccanti. {654.4} Bhagavā sammatideve adhidevāti abhiññāya upapattideve adhidevāti abhiññāya visuddhideve adhidevāti abhiññāya jānitvā tulayitvā tīrayitvā vibhāvayitvā vibhūtaṃ katvāti adhideve abhiññāya.

[655] Sabbaṃ vedi parovaranti bhagavā attano ca paresañca adhidevakare dhamme vedi aññāsi aphusi paṭivijjhi . katame Attano adhidevakarā dhammā . sammāpaṭipadā anulomapaṭipadā apaccanīkapaṭipadā dhammānudhammapaṭipadā sīlesu paripūrikāritā indriyesu guttadvāratā bhojane mattaññutā jāgariyānuyogo satisampajaññaṃ cattāro satipaṭṭhānā .pe. ariyo aṭṭhaṅgiko maggo ime vuccanti attano adhidevakarā dhammā . katame paresaṃ adhidevakarā dhammā . sammāpaṭipadā .pe. ariyo aṭṭhaṅgiko maggo ime vuccanti paresaṃ adhidevakarā dhammā . evaṃ bhagavā attano ca paresañca adhidevakare dhamme vedi aññāsi aphusi paṭivijjhīti sabbaṃ vedi parovaraṃ.

[656] Pañhānantakaro satthāti bhagavā pārāyanikapañhānaṃ antakaro pariyantakaro paricchedakaro parivaṭumakaro parisapañhānaṃ antakaro pariyantakaro paricchedakaro parivaṭumakaro piṅgiyapañhānaṃ antakaro pariyantakaro paricchedakaro parivaṭumakaro sakkapañhānaṃ amanussapañhānaṃ bhikkhupañhānaṃ bhikkhunīpañhānaṃ upāsakapañhānaṃ upāsikāpañhānaṃ rājapañhānaṃ khattiyapañhānaṃ brāhmaṇapañhānaṃ vessapañhānaṃ suddapañhānaṃ [4]- brahmapañhānaṃ antakaro pariyantakaro paricchedakaro parivaṭumakaroti pañhānantakaro . satthāti bhagavā satthavāho . yathā satthavāho satthe kantāraṃ tāreti corakantāraṃ tāreti vāḷakantāraṃ tāreti dubbhikkhakantāraṃ tāreti nirudakakantāraṃ tāreti uttāreti nittāreti [6]- Khemantabhūmiṃ sampāpeti evameva bhagavā satthavāho satte kantāraṃ tāreti jātijarābyādhimaraṇasokaparidevadukkhadomanassupāyāsakantāraṃ tāreti rāgakantāraṃ tāreti dosamohamānadiṭṭhikilesaduccaritakantāraṃ tāreti rāgagahanaṃ tāreti dosagahanaṃ tāreti mohagahanaṃ tāreti diṭṭhikilesaduccaritagahanaṃ tāreti uttāreti nittāreti khemantabhūmiṃ amataṃ nibbānaṃ sampāpetīti evaṃ bhagavā satthavāho . athavā bhagavā netā vinetā anunetā saññāpetā nijjhāpetā pekkhatā pasādetāti evampi bhagavā satthavāho . athavā bhagavā anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovido maggānugā ca pana etarahi sāvakā viharanti pacchā samannāgatāti evampi bhagavā satthavāhoti pañhānantakaro satthā.