[663] Sabbesu bhūtesu nidhāya daṇḍaṃ aheṭhayaṃ aññatarampi tesaṃ na puttamiccheyya kuto sahāyaṃ eko care khaggavisāṇakappo.

[664] Sabbesu bhūtesu nidhāya daṇḍanti sabbesūti sabbena sabbaṃ sabbathā sabbaṃ asesaṃ nissesaṃ pariyādāyavacanametaṃ sabbesūti . Bhūtesūti bhūtā vuccanti tasā ca thāvarā ca . tasāti yesaṃ taṇhā appahīnā yesañca bhayabheravā appahīnā . kiṃkāraṇā vuccanti tasā . te tasanti uttasanti paritasanti [2]- santāsaṃ āpajjanti taṃkāraṇā vuccanti tasā . thāvarāti yesaṃ taṇhā pahīnā yesañca bhayabheravā pahīnā . kiṃkāraṇā vuccanti thāvarā . Te na tasanti na uttasanti na paritasanti [4]- na santāsaṃ āpajjanti taṃkāraṇā vuccanti thāvarā . daṇḍāti tayo daṇḍā kāyadaṇḍo ca vacīdaṇḍo ca manodaṇḍo ca . Tividhaṃ kāyaduccaritaṃ kāyadaṇḍo catubbidhaṃ vacīduccaritaṃ vacīdaṇḍo tividhaṃ manoduccaritaṃ manodaṇḍo . Sabbesu bhūtesu nidhāya daṇḍanti sabbesu bhūtesu daṇḍaṃ nidhāya nidahitvā voropayitvā [7]- nikkhipitvā paṭippassambhitvāti sabbesu bhūtesu nidhāya daṇḍaṃ.

[665] Aheṭhayaṃ aññatarampi tesanti ekamattampi sattaṃ pāṇinā vā leḍḍunā vā daṇḍena vā satthena vā aruyā vā rajjuyā vā aviheṭhayanto sabbepi satte pāṇinā vā leḍḍunā vā daṇḍena vā satthena vā aruyā vā rajjuyā vā aviheṭhayantoti aheṭhayaṃ aññatarampi tesaṃ.

[666] Na puttamiccheyya kuto sahāyanti nāti paṭikkhepo . Puttāti cattāro puttā attajo putto khettajo putto dinnako putto antevāsiko putto . sahāyanti sahāyā vuccanti yehi saha gamanaṃ phāsu āgamanaṃ phāsu gamanāgamanaṃ phāsu [6]- nisajjanaṃ phāsu nipajjanaṃ phāsu ālapanaṃ phāsu sallapanaṃ phāsu [8]- samullapanaṃ phāsu. Na puttamiccheyya kuto sahāyanti puttampi na iccheyya na sādiyeyya [9]- na pihayeyya nābhijappeyya kuto mittaṃ vā sandiṭṭhaṃ vā sambhattaṃ vā sahāyaṃ vā icchissati sādiyissati pihayissati abhijappissatīti na puttamiccheyya kuto sahāyaṃ.