[668] Saṃsaggajātassa bhavanti snehā snehanvayaṃ dukkhamidaṃ pahoti ādīnavaṃ snehajaṃ pekkhamāno eko care khaggavisāṇakappo.

[669] Saṃsaggajātassa bhavanti snehāti saṃsaggāti dve saṃsaggā dassanasaṃsaggo ca savanasaṃsaggo ca. {669.1} Katamo dassanasaṃsaggo . idhekacco passati itthiṃ vā kumāriṃ vā abhirūpaṃ dassanīyaṃ pāsādikaṃ paramāya vaṇṇapokkharatāya samannāgataṃ disvā passitvā anubyañjanaso nimittaṃ gaṇhāti kesā vā sobhaṇā mukhaṃ vā sobhaṇaṃ akkhi vā sobhaṇaṃ kaṇṇā vā Sobhaṇā nāsā vā sobhaṇā oṭṭhaṃ vā sobhaṇaṃ dantā vā sobhaṇā mukhaṃ vā sobhaṇaṃ givā vā sobhaṇā thanā vā sobhaṇā uraṃ vā sobhaṇaṃ udaraṃ vā sobhaṇaṃ kaṭi vā sobhaṇā uru vā sobhaṇā jaṅghā vā sobhaṇā hatthā vā sobhaṇā aṅguliyo vā sobhaṇā nakhā vā sobhaṇāti disvā passitvā abhinandati abhivadati abhipattheti anuppādeti anubandhati rāgabandhanaṃ ayaṃ dassanasaṃsaggo. {669.2} Katamo savanasaṃsaggo . idhekacco suṇāti amukasmiṃ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatāti sutvā suṇitvā abhinandati abhivadati abhipattheti anuppādeti anubandhati rāgabandhanaṃ ayaṃ savanasaṃsaggo. {669.3} Snehāti dve snehā taṇhāsneho ca diṭṭhisneho ca. {669.4} Katamo taṇhāsneho . yāvatā taṇhāsaṅkhātena sīmakataṃ mariyādikataṃ odhikataṃ pariyantikataṃ pariggahitaṃ mamāyitaṃ idaṃ mamaṃ etaṃ mamaṃ ettakaṃ mamaṃ ettāvatā mamaṃ mama rūpā saddā gandhā rasā phoṭṭhabbā attharaṇā pāpuraṇā dāsīdāsā ajeḷakā kukkuṭasūkarā hatthigavāssavaḷavā khettaṃ vatthu hiraññaṃ suvaṇṇaṃ gāmanigamarājadhāniyo raṭṭhañca janapado ca koso ca koṭṭhāgārañca kevalampi mahāpaṭhaviṃ taṇhāvasena mamāyati yāvatā aṭṭhasatataṇhāviparītā Ayaṃ taṇhāsneho. {669.5} Katamo diṭṭhisneho. Vīsativatthukā sakkāyadiṭṭhi dasavatthukā micchādiṭṭhi dasavatthukā antaggāhikā diṭṭhi yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaññojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyesaggāho viparītaggāho vippallāsaggāho micchāgāho ayāthāvakasmiṃ yāthāvakanti gāho yāvatā dvāsaṭṭhī diṭṭhigatāni ayaṃ diṭṭhisneho. {669.6} Saṃsaggajātassa bhavanti snehāti vippallāsapaccayā ca dassanasavanasaṃsaggapaccayā ca taṇhāsneho ca diṭṭhisneho ca bhavanti jāyanti sañjāyanti nibbattanti abhinibbattanti pātubhavantīti saṃsaggajātassa bhavanti snehā.