[671] Ādīnavaṃ snehajaṃ pekkhamānoti snehoti dve snehā taṇhāsneho ca diṭṭhisneho ca .pe. ayaṃ taṇhāsneho .pe. Ayaṃ diṭṭhisneho . ādīnavaṃ snehajaṃ pekkhamānoti taṇhāsnehe ca diṭṭhisnehe ca ādīnavaṃ pekkhamāno [4]- olokayamāno nijjhāyamāno upaparikkhamānoti ādīnavaṃ snehajaṃ pekkhamāno . Eko care khaggavisāṇakappo. Tenāha so paccekasambuddho saṃsaggajātassa bhavanti snehā snehanvayaṃ dukkhamidaṃ pahoti Ādīnavaṃ snehajaṃ pekkhamāno eko care khaggavisāṇakappoti.
[672] Mitte suhajje anukampamāno hāpeti atthaṃ paṭibaddhacitto etaṃ bhayaṃ santhave pekkhamāno eko care khaggavisāṇakappo.
[673] Mitte suhajje anukampamāno hāpeti atthaṃ paṭibaddhacittoti mittota dve mittā āgārikamitto ca anāgārikamitto ca. Katamo āgārikamitto . idhekacco duddadaṃ dadāti duccajaṃ cajati dukkaraṃ karoti dukkhamaṃ khamati guyhamassa ācikkhati guyhamassa pariguyhati āpadāsu na vijahati jīvitaṃ cassa atthāya pariccattaṃ hoti khīṇe nātimaññati ayaṃ āgārikamitto. {673.1} Katamo anāgārikamitto. Idha bhikkhu piyo ca hoti manāpo ca hoti garu ca bhāvaniyo ca [5]- vacanakkhamo ca gambhīrañca kathaṃ kattā aṭṭhāne ca na niyojeti adhisīle samādapeti catunnaṃ satipaṭṭhānānaṃ bhāvanānuyoge samādapeti catunnaṃ sammappadhānānaṃ .pe. catunnaṃ iddhippādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassa bhāvanānuyoge samādapeti ayaṃ anāgārikamitto. Mitte suhajje anukampamāno hāpeti atthanti mitte ca suhajje ca sandiṭṭhe ca sambhatte ca sahāye ca anukampamāno anupekkhamāno anuggayhamāno attatthampi paratthampi hāpeti ubhayatthampi hāpeti diṭṭhadhammikampi atthaṃ hāpeti samparāyikampi atthaṃ hāpeti paramatthampi hāpeti [1]- paridhaṃseti parisajjeti antaradhāpetīti mitte suhajje anukampamāno hāpeti atthaṃ. {673.3} Paṭibaddhacittoti dvīhi kāraṇehi paṭibaddhacitto hoti attānaṃ vā nīcaṃ ṭhapento paraṃ uccaṃ ṭhapento paṭibaddhacitto hoti attānaṃ vā uccaṃ ṭhapento paraṃ nīcaṃ ṭhapento paṭibaddhacitto hoti. {673.4} Kathaṃ attānaṃ nīcaṃ ṭhapento paraṃ uccaṃ ṭhapento paṭibaddhacitto hoti . tumhe me bahūpakārakā ahaṃ tumhe nissāya labhāmi cīvarapiṇḍapātasenāsanagilānapaccayabhesajjaparikkhāraṃ yampi me aññe dātuṃ vā kātuṃ vā maññanti tumhe nissāya tumhe sampassantā yampi me porāṇaṃ mātāpettikaṃ nāmagottaṃ tampi [4]- antarahitaṃ tumhehi ahaṃ ñāyāmi asukassa kulupako asukāya Kulupakoti evaṃ attānaṃ nīcaṃ ṭhapento paraṃ uccaṃ ṭhapento paṭibaddhacitto hoti. {673.5} Kathaṃ attānaṃ uccaṃ ṭhapento paraṃ nīcaṃ ṭhapento paṭibaddhacitto hoti . ahaṃ tumhākaṃ bahūpakāro tumhe maṃ āgamma buddhaṃ saraṇaṃ gatā dhammaṃ saraṇaṃ gatā saṅghaṃ saraṇaṃ gatā pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā surāmerayamajjapamādaṭṭhānā paṭiviratā ahaṃ tumhākaṃ uddesampi paripucchampi sīlampi uposathampi ācikkhāmi navakammaṃ adhiṭṭhāmi atha ca pana tumhe maṃ pariccajitvā aññe sakkarotha garukarotha mānetha pūjethāti evaṃ attānaṃ uccaṃ ṭhapento paraṃ nīcaṃ ṭhapento paṭibaddhacitto hotīti mitte suhajje anukampamāno hāpeti atthaṃ paṭibaddhacitto.