[697] Voropayitvā gihibyañjanāni sañchinnapatto yathā koviḷāro chetvāna vīro gihibandhanāni eko care khaggavisāṇakappo.

[698] Voropayitvā gihibyañjanānīti gihibyañjanāni vuccanti kesā ca massū ca mālā ca gandhaṃ ca vilepanaṃ ca ābharaṇaṃ ca pilandanaṃ ca vatthañca pārupanañca veṭṭhanañca ucchādanañca parimaddanañca nahāpanaṃ sambāhanaṃ ādāsaṃ añjanaṃ mālāvilepanaṃ Mukhacuṇṇakaṃ mukhalepaṃ hatthabaddhanaṃ sikhābandhaṃ daṇḍaṃ nāḷikaṃ khaggaṃ chattaṃ upāhanā uṇhisaṃ maṇi vālavijanī vodātāni vatthāni dīgharassāni iti vā . voropayitvā gihibyañjanānīti [5]- voropetvā [6]- nikkhipitvā paṭisambhayitvāti voropayitvā gihibyañjanāni.

[699] Sañchinnapatto yathā koviḷāroti yathā koviḷārassa pattāni sīnāni chinnāni [8]- patitāni [9]- evameva tassa paccekasambuddhassa gihibyañjanāni chinnāni [10]- patitānīti sañchinnapatto yathā koviḷāro.

[700] Chetvāna vīro gihibandhanānīti [11]- viriyavāti vīro. Pahūti vīro . visavīti vīro . alamattoti vīro . sūroti vīro. Vikkanto abhiru acchambhī anutrāsī apalāyī pahīnabhayabheravo vigatalomahaṃsoti vīro. Ārato idheva sabbapāpakehi nirayadukkhamaticca viriyavāso so viriyavā padhānavā vīro tādi vuccate tathattā. Gihibandhanāni vuccanti puttā ca [14]- dāsīdāsā ca ajeḷakā ca kukkuṭasūkarā ca hatthigavāssavaḷavā ca khettañca vatthu ca hiraññañca suvaṇṇañca gāmanigamarājadhāniyo ca raṭṭhañca janapado ca koso ca koṭṭhāgārañca yaṅkiñci rajanīyavatthu . chetvāna vīro Gihibandhanānīti so paccekasambuddho vīro gihibandhanāni chinditvā samucchinditvā jahitvā vinodetvā byantīkaritvā anabhāvaṅgametvāti chetvāna vīro gihibandhanāni . eko care khaggavisāṇakappo . Tenāha so paccekasambuddho voropayitvā gihibyañjanāni sañchinnapatto yathā koviḷāro chetvāna vīro gihibandhanāni eko care khaggavisāṇakappoti.