[73] Sotānaṃ saṃvaraṃ brūhīti sotānaṃ āvaraṇaṃ nīvaraṇaṃ saṃvaraṇaṃ rakkhanaṃ gopanaṃ brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti sotānaṃ saṃvaraṃ brūhi.

[74] Kena sotā pithiyyareti kena sotā pithiyyanti pacchijjanti na savanti na āsavanti na sandanti nappavattantīti kena sotā pithiyyare. Tenāha so brāhmaṇo savanti sabbadhi sotā (iccāyasmā ajito) sotānaṃ kinnivāraṇaṃ sotānaṃ saṃvaraṃ brūhi kena sotā pithiyyareti.

[75] Yāni sotāni lokasmiṃ (ajitāti bhagavā) sati tesaṃ nivāraṇaṃ sotānaṃ saṃvaraṃ brūmi Paññāyete pithiyyare.

[76] Yāni sotāni lokasminti yāni etāni sotāni mayā kittitāni [1]- ācikkhitāni desitāni paññapitāni paṭṭhapitāni vivaritāni vibhajitāni uttānīkatāni pakāsitāni seyyathīdaṃ taṇhāsoto diṭṭhisoto kilesasoto duccaritasoto avijjāsoto . lokasminti apāyaloke manussaloke devaloke khandhaloke dhātuloke āyatanaloketi yāni sotāni lokasmiṃ. Ajitāti bhagavā taṃ brāhmaṇaṃ nāmena ālapati.