[701] Sace labhetha nipakaṃ sahāyaṃ saddhiṃcaraṃ sādhuvihāri dhīraṃ abhibhuyya sabbāni parissayāni careyya tenattamano satimā.

[702] Sace labhetha nipakaṃ sahāyanti sace nipakaṃ paṇḍitaṃ paññavantaṃ buddhimantaṃ ñāṇiṃ vibhāviṃ medhāviṃ sahāyaṃ labheyya paṭilabheyya adhigaccheyya vindeyyāti sace labhetha nipakaṃ sahāyaṃ.

[703] Saddhiṃcaraṃ sādhuvihāri dhīranti saddhiṃcaranti ekato caraṃ . Sādhuvihārinti paṭhamenapi jhānena sādhuvihāriṃ dutiyenapi jhānena tatiyenapi jhānena catutthenapi jhānena sādhuvihāriṃ mettāyapi cetovimuttiyā sādhuvihāriṃ karuṇāyapi muditāyapi upekkhāyapi cetovimuttiyā sādhuvihāriṃ ākāsānañcāyatanasamāpattiyāpi Sādhuvihāriṃ viññāṇañcāyatanasamāpattiyāpi ākiñcañcāyatanasamāpattiyāpi nevasaññānāsaññāyatanasamāpattiyāpi sādhuvihāriṃ nirodhasamāpattiyāpi sādhuvihāriṃ phalasamāpattiyāpi sādhuvihāriṃ . Dhīranti dhīraṃ paṇḍitaṃ paññavantaṃ buddhimantaṃ ñāṇiṃ vibhāviṃ medhāvinti saddhiṃcaraṃ sādhuvihāri dhīraṃ.

[704] Abhibhuyya sabbāni parissayānīti parissayāti dve parissayā pākaṭaparissayā ca paṭicchannaparissayā ca .pe. ime vuccanti pākaṭaparissayā .pe. ime vuccanti paṭicchannaparissayā. [1]- Abhibhuyya sabbāni parissayānīti sabbāni parissayāni abhibhuyya abhibhavitvā ajjhottharitvā pariyādayitvāti abhibhuyya sabbāni parissayāni.