[713] Ete aladdhā anavajjabhojīti atthi puggalo sāvajjabhojī atthi puggalo anavajjabhojī. {713.1} Katamo ca puggalo sāvajjabhojī. Idhekacco puggalo kuhanāya lapanāya nemittakatāya nippesikatāya lābhena lābhaṃ nijigiṃsanatāya dārudānena veḷudānena pattadānena pupphadānena [4]- sinānadānena cuṇṇadānena mattikadānena dantakaṭṭhadānena mukhodakadānena pātukamyatāya muggasūpatāya pāribhaṭyatāya parapiṭṭhimaṃsikatāya vatthuvijjāya tiracchānavijjāya aṅgavijjāya nakkhattavijjāya dūtagamanena pahīnagamanena jaṅghapesanīyena vejjakammena dūtakammena piṇḍapaṭipiṇḍakena Dānānuppadānena adhammena visamena laddhā labhitvā paṭilabhitvā adhigantvā vinditvā jīvikaṃ kappeti ayaṃ vuccati puggalo sāvajjabhojī. {713.2} Katamo ca puggalo anavajjabhojī. Idhekacco puggalo na kuhanāya na lapanāya na nemittakatāya na nippesikatāya na lābhena lābhaṃ nijigiṃsanatāya na dārudānena na veḷudānena na pattadānena na pupphadānena na sinānadānena na cuṇṇadānena na mattikadānena na dantakaṭṭhadānena na mukhodakadānena na pātukamyatāya na muggasūpatāya na pāribhaṭyatāya na parapiṭṭhimaṃsikatāya na vatthuvijjāya na tiracchānavijjāya na aṅgavijjāya na nakkhattavijjāya na dūtagamanena na pahīnagamanena na jaṅghapesanīyena na vejjakammena na dūtakammena na piṇḍapaṭipiṇḍakena na dānānuppadānena dhammena samena laddhā labhitvā paṭilabhitvā adhigantvā vinditvā jīvikaṃ kappeti ayaṃ vuccati puggalo anavajjabhojī. {713.3} Ete aladdhā anavajjabhojīti ete aladdhā alabhitvā apaṭilabhitvā anadhigantvā avinditvāti ete aladdhā anavajjabhojī . Eko care khaggavisāṇakappo. Tenāha so paccekasambuddho addhā pasaṃsāma sahāyasampadaṃ seṭṭhā samā sevitabbā sahāyā ete aladdhā anavajjabhojī Eko care khaggavisāṇakappoti.