[714] Disvā suvaṇṇassa pabhassarāni kammāraputtena suniṭṭhitāni saṅghaṭṭayantāni duve bhujasmiṃ eko care khaggavisāṇakappo.

[715] Disvā suvaṇṇassa pabhassarānīti disvā passitvā tulayitvā tīrayitvā vibhāvayitvā vibhūtaṃ katvā . suvaṇṇassāti jātarūpassa . pabhassarānīti parisuddhāni pariyodātānīti disvā suvaṇṇassa pabhassarāni.

[716] Kammāraputtena suniṭṭhitānīti kammāraputto vuccati suvaṇṇakāro . kammāraputtena suniṭṭhitānīti kammāraputtena suniṭṭhitāni sukatāni suparikammānīti kammāraputtena suniṭṭhitāni.

[717] Saṅghaṭṭayantāni duve bhujasminti bhujo vuccati hattho . Yathā ekasmiṃ hatthe dve dhuvarāni ghaṭenti evameva sattā taṇhāvasena [3]- ghaṭenti tiracchānayoniyaṃ ghaṭenti pittivisaye ghaṭenti manussaloke ghaṭenti devaloke ghaṭenti gatiyā gatiṃ upapattiyā upapattiṃ paṭisandhiyā paṭisandhiṃ bhavena bhavaṃ saṃsārena saṃsāraṃ vaṭṭena vaṭṭaṃ ghaṭenti [5]- caranti viharanti iriyanti vattenti pālenti yapenti yāpentīti saṅghaṭṭayantāni duve bhujasmiṃ . eko care khaggavisāṇakappo. Tenāha so paccekasambuddho Disvā suvaṇṇassa pabhassarāni kammāraputtena suniṭṭhitāni saṅghaṭṭayantāni duve bhujasmiṃ eko care khaggavisāṇakappoti.