[718] Evaṃ dutīyena sahā mamassa vācābhilāpo abhisajjanā vā etaṃ bhayaṃ āyatiṃ pekkhamāno eko care khaggavisāṇakappo.

[719] Evaṃ dutīyena sahā mamassāti taṇhādutiyena . Taṇhādutiyo vā hoti puggaladutiyo vā . kathaṃ taṇhādutiyo hoti . taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā . yassesā taṇhā appahīnā so vuccati taṇhādutiyo. Taṇhādutiyo puriso dīghamaddhāna saṃsaraṃ itthabhāvaññathābhāvaṃ saṃsāraṃ nātivattati. Evaṃ taṇhādutiyo hoti . kathaṃ puggaladutiyo hoti . idhekacco na attahetu na kāraṇahetu uddhato avūpasantacitto ekassa vā dutiyo hoti dvinnaṃ vā tatiyo hoti tiṇṇaṃ vā catuttho hoti tattha bahuṃ samphappalāpaṃ lapati seyyathīdaṃ rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ

[720] Vācābhilāpo abhisajjanā vāti vācābhilāpo vuccati battiṃsa tiracchānakathā seyyathīdaṃ rājakathā corakathā .pe. Itibhavābhavakathā iti vā . abhisajjanāti dve sajjanā taṇhāsajjanā ca diṭṭhisajjanā ca .pe. ayaṃ taṇhāsajjanā .pe. ayaṃ diṭṭhisajjanāti vācābhilāpo abhisajjanā vā.

[721] Etaṃ bhayaṃ āyatiṃ pekkhamānoti bhayanti jātibhayaṃ jarābhayaṃ byādhibhayaṃ maraṇabhayaṃ rājabhayaṃ corabhayaṃ aggibhayaṃ udakabhayaṃ attānuvādabhayaṃ parānuvādabhayaṃ daṇḍabhayaṃ duggatibhayaṃ ūmibhayaṃ kumbhilabhayaṃ āvaṭṭabhayaṃ suṃsukābhayaṃ ājīvikābhayaṃ asilokabhayaṃ parisasārajjabhayaṃ [7]- bhayānakaṃ chambhitattaṃ lomahaṃso cetaso ubbeggo utrāso . Etaṃ bhayaṃ āyatiṃ pekkhamānoti etaṃ bhayaṃ āyatiṃ pekkhamāno dakkhamāno olokayamāno nijjhāyamāno upaparikkhamānoti etaṃ bhayaṃ āyatiṃ pekkhamāno . eko care khaggavisāṇakappo . tenāha so paccekasambuddho evaṃ dutīyena sahā mamassa vācābhilāpo abhisajjanā vā Etaṃ bhayaṃ āyatiṃ pekkhamāno eko care khaggavisāṇakappoti.