[729] Sītañca uṇhañca khudaṃ pipāsaṃ vātātape ḍaṃsasiriṃsape ca sabbāni petāni abhisaṃbhavitvā eko care khaggavisāṇakappo.

[730] Sītañca uṇhañca khudaṃ pipāsanti [2]- dvīhi kāraṇehi sītaṃ hoti abbhantaradhātupakopavasena vā sītaṃ hoti bahiddhāutuvasena vā sītaṃ hoti . uṇhanti dvīhi kāraṇehi uṇhaṃ hoti abbhantaradhātupakopavasena vā uṇhaṃ hoti bahiddhāutuvasena vā uṇhaṃ hoti . khuddā vuccati chātako . pipāsā vuccati udakampīti sītañca uṇhañca khudaṃ pipāsaṃ.

[731] Vātātape ḍaṃsasiriṃsape cāti vātāti puratthimā vātā pacchimā vātā uttarā vātā dakkhiṇā vātā sarajā vātā [5]- Sītā vātā uṇhā vātā parittā vātā adhimattā vātā verambhavātā [1]- supaṇṇavātā tālapaṇṇavātā vidhūpanavātā . Ātapo vuccati suriyasantāpo . ḍaṃsā vuccanti piṅgalamakkhikā . Siriṃsapā vuccanti ahīti vātātape ḍaṃsasiriṃsape ca.

[732] Sabbāni petāni abhisaṃbhavitvāti abhibhavitvā ajjhottharitvā pariyādiyitvā madditvāti sabbāni petāni abhisaṃbhavitvā . Eko care khaggavisāṇakappo. Tenāha so paccekasambuddho sītañca uṇhañca khudaṃ pipāsaṃ vātātape ḍaṃsasiriṃsape ca sabbāni petāni abhisaṃbhavitvā eko care khaggavisāṇakappoti.