[738] Aṭṭhāna taṃ saṅgaṇikāratassa yaṃ phussaye sāmayikaṃ vimuttinti vuttaṃ hetaṃ bhagavatā yāvatānanda bhikkhu saṅgaṇikārāmo saṅgaṇikarato saṅgaṇikārāmataṃ anuyutto gaṇārāmo gaṇarato gaṇasammudito gaṇārāmataṃ anuyutto yantaṃ nekkhammasukhaṃ pavivekasukhaṃ upasamasukhaṃ sambodhisukhaṃ tassa sukhassa nikāmalābhī bhavissati akicchalābhī akasiralābhīti netaṃ ṭhānaṃ vijjati . yo ca kho so ānanda bhikkhu eko gaṇasmā vūpakaṭṭho viharati tassetaṃ bhikkhuno pāṭikaṅkhaṃ yantaṃ nekkhammasukhaṃ pavivekasukhaṃ upasamasukhaṃ sambodhisukhaṃ tassa sukhassa nikāmalābhī bhavissati akicchalābhī akasiralābhīti ṭhānametaṃ vijjati . yāvatānanda bhikkhu saṅgaṇikārāmo saṅgaṇikarato saṅgaṇikārāmataṃ anuyutto gaṇārāmo gaṇarato gaṇasammudito gaṇārāmataṃ anuyutto sāmayikaṃ vā cetovimuttiṃ upasampajja viharissati asāmayikaṃ vā akuppanti netaṃ ṭhānaṃ vijjati . Yo ca kho so ānanda bhikkhu eko gaṇasmā vūpakaṭṭho viharati tassetaṃ bhikkhuno pāṭikaṅkhaṃ sāmayikaṃ vā cetovimuttiṃ upasampajja viharissati asāmayikaṃ vā akuppanti ṭhānametaṃ vijjatīti . aṭṭhāna taṃ saṅgaṇikāratassa yaṃ phussaye sāmayikaṃ vimuttiṃ.

[739] Ādiccabandhussa vaco nisammāti ādicco vuccati suriyo . so gotamo gottena paccekasambuddhopi gotamo gottena so paccekasambuddhopi suriyassa gottañātako gottabandhu Tasmā paccekasambuddho ādiccabandhu . ādiccabandhussa vaco nisammāti ādiccabandhussa vacanaṃ byapathaṃ desanaṃ anusandhiṃ sutvā suṇitvā uggahetvā upadhārayitvā upalakkhayitvāti ādiccabandhussa vaco nisamma . eko care khaggavisāṇakappo . tenāha so paccekasambuddho aṭṭhāna taṃ saṅgaṇikāratassa yaṃ phussaye sāmayikaṃ vimuttiṃ ādiccabandhussa vaco nisamma eko care khaggavisāṇakappoti.

[740] Diṭṭhīvisūkāni upātivatto patto niyāmaṃ paṭiladdhamaggo uppannañāṇomhi anaññaneyyo eko care khaggavisāṇakappo.