[746] Nimmakkho niddhantakasāvamohoti makkhāti yo makkho makkhāyanā makkhāyitattaṃ niṭṭhuriyaṃ niṭṭhuriyakammaṃ . kasāvāti rāgo kasāvo doso kasāvo moho kasāvo kodho upanāho makkho paḷāso .pe. sabbākusalābhisaṅkhārā kasāvā . mohoti dukkhe añāṇaṃ dukkhasamudaye añāṇaṃ dukkhanirodhe añāṇaṃ dukkhanirodhagāminiyā paṭipadāya añāṇaṃ pubbante añāṇaṃ aparante añāṇaṃ pubbantāparante añāṇaṃ idappaccayatāpaṭiccasamuppannesu dhammesu añāṇaṃ yaṃ evarūpaṃ añāṇaṃ adassanaṃ anabhisamayo ananurodho Asambodho appaṭivedho asaṅgāhanā apariyogāhanā asamapekkhanā apaccavekkhanā apaccakkhakammaṃ dummejjhaṃ bālyaṃ asampajaññaṃ moho [2]- sammoho [3]- avijjogho avijjāyogo avijjānusayo avijjāpariyuṭṭhānaṃ avijjājālaṃ avijjālaṅgī moho akusalamūlaṃ . Tassa paccekasambuddhassa makkho ca kasāvo ca moho ca vantā [5]- niddhantā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhā tasmā so paccekasambuddho nimmakkho niddhantakasāvamoho.

[747] Nirāsaso sabbaloke bhavitvāti āsā vuccati taṇhā yo rāgo sārāgo .pe. abhijjhā lobho akusalamūlaṃ . Sabbaloketi sabbaapāyaloke sabbamanussaloke sabbadevaloke sabbakhandhaloke sabbadhātuloke sabbaāyatanaloke . nirāsaso sabbaloke bhavitvāti sabbaloke nirāsaso bhavitvā nittaṇho bhavitvā nippipāso bhavitvāti nirāsaso sabbaloke bhavitvā . Eko care khaggavisāṇakappo. Tenāha so paccekasambuddho nillolupo nikkuho nippipāso nimmakkho niddhantakasāvamoho nirāsaso sabbaloke bhavitvā eko care khaggavisāṇakappoti.

[748] Pāpaṃ sahāyaṃ parivajjayetha Anatthadassiṃ visame niviṭṭhaṃ sayaṃ na seve pasutaṃ pamattaṃ eko care khaggavisāṇakappo.

[749] Pāpaṃ sahāyaṃ parivajjayethāti pāpasahāyo vuccati yo so sahāyo dasavatthukāya micchādiṭṭhiyā samannāgato natthi dinnaṃ natthi yiṭṭhaṃ [1]- natthi sukatadukkaṭānaṃ kammānaṃ phalaṃ vipāko natthi ayaṃ loko natthi paro loko natthi mātā natthi pitā natthi sattā opapātikā natthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti ayaṃ pāpasahāyo . pāpaṃ sahāyaṃ parivajjayethāti pāpaṃ sahāyaṃ parivajjayetha vivajjeyya parivajjeyyāti pāpaṃ sahāyaṃ parivajjayetha.