[755] Aññāya atthāni vineyya kaṅkhanti attatthaṃ aññāya paratthaṃ aññāya ubhayatthaṃ aññāya diṭṭhadhammikatthaṃ aññāya samparāyikatthaṃ aññāya paramatthaṃ aññāya abhiññāya jānitvā tulayitvā tīrayitvā vibhāvayitvā vibhūtaṃ katvā kaṅkhaṃ vineyya paṭivineyya pajaheyya vinodeyya byantīkareyya anabhāvaṅgameyyāti aññāya atthāni vineyya kaṅkhaṃ . eko care khaggavisāṇakappo . Tenāha so paccekasambuddho bahussutaṃ dhammadharaṃ bhajetha mittaṃ uḷāraṃ paṭibhāṇavantaṃ aññāya atthāni vineyya kaṅkhaṃ eko care khaggavisāṇakappoti.

[756] Khiḍḍā ratī kāmasukhañca loke analaṅkaritvā anapekkhamāno vibhūsanaṭṭhānā virato saccavādī eko care khaggavisāṇakappo.

[757] Khiḍḍā ratī kāmasukhañca loketi khiḍḍāti dve khiḍḍā kāyikā ca khiḍḍā vācasikā ca khiḍḍā .pe. ayaṃ Kāyikā khiḍḍā .pe. ayaṃ vācasikā khiḍḍā. Ratīti anukkaṇṭhitādhivacanametaṃ ratīti . kāmasukhanti vuttañhetaṃ bhagavatā pañcime bhikkhave kāmaguṇā katame pañca cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā sotaviññeyyā saddā ghānaviññeyyā gandhā jivhāviññeyyā rasā kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā ime kho bhikkhave pañca kāmaguṇā yaṃ kho bhikkhave ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhanti kāmasukhañca . Loketi manussaloketi khiḍḍā ratī kāmasukhañca loke.

[758] Analaṅkaritvā anapekkhamānoti khiḍḍañca ratiñca kāmasukhañca loke analaṅkaritvā anapekkhā hutvā pajahitvā vinodetvā byantīkaritvā anabhāvaṅgametvāti analaṅkaritvā anapekkhamāno.