[759] Vibhūsanaṭṭhānā virato saccavādīti vibhūsāti dve vibhūsā atthi āgārikavibhūsā atthi anāgārikavibhūsā. {759.1} Katamā āgārikavibhūsā. Kesā ca massu ca mālā ca gandhā ca vilepanañca ābharaṇañca pilandhanañca vatthañca pasādhanañca veṭṭhanañca ucchādanaṃ parimaddanaṃ nahāpanaṃ sambāhanaṃ ādāsaṃ añjanaṃ mālāvilepanaṃ mukhacuṇṇakaṃ mukhalepanaṃ hatthabandhaṃ visikkhābandhaṃ Daṇḍaṃ nāḷikaṃ khaggaṃ chattaṃ upāhanā uṇhisaṃ vālavijjanī odātāni vatthāni dīgharassāni iti vā ayaṃ āgārikavibhūsā. {759.2} Katamā anāgārikavibhūsā . cīvaramaṇḍanā pattamaṇḍanā senāsanamaṇḍanā imassa vā pūtikāyassa bāhirānaṃ vā parikkhārānaṃ maṇḍanā vibhūsanā keḷanā parikeḷanā gedhikatā gedhikattaṃ capalanā cāpalyaṃ ayaṃ anāgārikavibhūsā. {759.3} Saccavādīti so paccekasambuddho saccavādī saccasandho theto paccayiko [2]- lokassa vibhūsanaṭṭhānā ārato [3]- paṭivirato nikkhanto nissaṭṭho vippamutto visaññutto vimariyādikatena cetasā viharatīti vibhūsanaṭṭhānā virato saccavādī . eko care khaggavisāṇakappo . Tenāha so paccekasambuddho khiḍḍā ratī kāmasukhañca loke analaṅkaritvā anapekkhamāno vibhūsanaṭṭhānā virato saccavādī eko care khaggavisāṇakappoti.

[760] Puttañca dāraṃ pitarañca mātaraṃ dhanāni dhaññāni ca bandhavāni hitvāna kāmāni yathodhikāni eko care khaggavisāṇakappo.

[761] Puttañca dāraṃ pitarañca mātaranti puttanti cattāro Puttā atrajo putto khettajo putto dinnako putto antevāsiko putto . dārā vuccanti bhariyāyo . pitāti yo so janako . mātāti yā sā janikāti puttañca dāraṃ pitarañca mātaraṃ.