[762] Dhanāni dhaññāni ca bandhavānīti dhanāni vuccanti [1]- muttā maṇi veḷuriyo saṅkho silā pavāḷaṃ rajataṃ jātarūpaṃ lohitaṅgo masāragallo . dhaññāni vuccanti pubbaṇṇaṃ aparaṇṇaṃ . Pubbaṇṇaṃ nāma sālī vīhi yavo godhumo kaṅgu varako kudrusako . Aparaṇṇaṃ nāma sūpeyyaṃ . bandhavānīti cattāro bandhavo ñātibandhavāpi bandhu gottabandhavāpi bandhu mittabandhavāpi bandhu sippabandhavāpi bandhūti dhanāni dhaññāni ca bandhavāni.

[763] Hitvāna kāmāni yathodhikānīti kāmāti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. ime vuccanti kilesakāmā . hitvāna kāmānīti vatthukāme parijānitvā kilesakāme pahāya pajahitvā vinodetvā byantīkaritvā anabhāvaṅgametvāti hitvāna kāmāni . yathodhikānīti sotāpattimaggena ye kilesā pahīnā te kilese na puneti na pacceti na paccāgacchati sakadāgāmimaggena ye kilesā pahīnā anāgāmimaggena ye kilesā pahīnā arahattamaggena ye kilesā pahīnā te kilese na puneti na pacceti na paccāgacchatīti Hitvāna kāmāni yathodhikāni . eko care khaggavisāṇakappo . Tenāha so paccacekasambuddho puttañca dāraṃ pitarañca mātaraṃ dhanāni dhaññāni ca bandhavāni hitvāna kāmāni yathodhikāni eko care khaggavisāṇakappoti.

[764] Saṅgo eso parittamettha sokhyaṃ appassādo dukkhamettha bhiyyo gaṇḍo eso iti ñatvā matimā eko care khaggavisāṇakappo.

[765] Saṅgo eso parittamettha sokhyanti saṅgoti vā baḷisanti vā āmisanti vā laggananti vā palibodhoti vā pañcannetaṃ kāmaguṇānaṃ adhivacanaṃ . parittamettha sokhyanti vuttañhetaṃ bhagavatā pañcime bhikkhave kāmaguṇā katame pañca cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā sotaviññeyyā saddā ghānaviññeyyā gandhā jivhāviññeyyā rasā kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā ime kho bhikkhave pañca kāmaguṇā yaṃ kho bhikkhave ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ appakaṃ etaṃ Sukhaṃ [1]- omakaṃ etaṃ sukhaṃ lāmakaṃ etaṃ sukhaṃ dukkhaṃ etaṃ sukhanti saṅgo eso parittamettha sokhyaṃ.