[776] Ohārayitvā gihibyañjanāni sañchinnapatto yathā pārichatto kāsāyavattho abhinikkhamitvā eko care khaggavisāṇakappo.

[777] Ohārayitvā gihibyañjanānīti gihibyañjanāni vuccanti kesā ca massū ca .pe. dīgharassāni iti vā . ohārayitvā gihibyañjanānīti gihibyañjanāni oropayitvā samoropayitvā [2]- paṭippassambhitvāti ohārayitvā gihibyañjanāni.

[778] Sañchinnapatto yathā pārichattoti yathā [3]- pārichattako koviḷāro bahalapattapalāso saṇḍacchāyo evameva so paccekasambuddho paripuṇṇapattacīvaradharoti sañchinnapatto yathā pārichatto.

[779] Kāsāyavattho abhinikkhamitvāti so paccekasambuddho sabbaṃ gharāvāsapalibodhaṃ chinditvā puttadārapalibodhaṃ chinditvā ñātipalibodhaṃ Chinditvā [1]- sannidhipalibodhaṃ chinditvā kesamassuṃ ohārayitvā kāsāyāni vatthāni acchādetvā agārasmā anagāriyaṃ pabbajitvā akiñcanabhāvaṃ upagantvā eko carati vicarati iriyati vatteti pāleti yapeti yāpetīti kāsāyavattho abhinikkhamitvā . eko care khaggavisāṇakappo. Tenāha so paccekasambuddho ohārayitvā gihibyañjanāni sañchinnapatto yathā pārichatto kāsāyavattho abhinikkhamitvā eko care khaggavisāṇakappoti.