[780] Rasesu gedhaṃ akaraṃ alolo anaññaposī sapadānacārī kule kule appaṭibaddhacitto eko care khaggavisāṇakappo.

[781] Rasesu gedhaṃ akaraṃ aloloti rasesūti mūlaraso khandharaso tacaraso pattaraso puppharaso phalaraso ambilaṃ madhuraṃ tittikaṃ kaṭukaṃ loṇikaṃ khārikaṃ lambilaṃ kasāvo sāduṃ asāduṃ sītaṃ uṇhaṃ. Santi loke samaṇabrāhmaṇā rasagiddhā te jivhaggena rase pariyesantā āhiṇḍanti . ambilaṃ labhitvā anambilaṃ pariyesanti anambilaṃ labhitvā ambilaṃ pariyesanti . madhuraṃ labhitvā amadhuraṃ pariyesanti amadhuraṃ labhitvā madhuraṃ pariyesanti . tittikaṃ labhitvā Atittikaṃ pariyesanti atittikaṃ labhitvā tittikaṃ pariyesanti . Kaṭukaṃ labhitvā akaṭukaṃ pariyesanti akaṭukaṃ labhitvā kaṭukaṃ pariyesanti . Loṇikaṃ labhitvā aloṇikaṃ pariyesanti aloṇikaṃ labhitvā loṇikaṃ pariyesanti . khārikaṃ labhitvā akhārikaṃ pariyesanti akhārikaṃ labhitvā khārikaṃ pariyesanti . lambilaṃ labhitvā kasāvaṃ pariyesanti kasāvaṃ labhitvā lambilaṃ pariyesanti. [4]- Sāduṃ labhitvā asāduṃ pariyesanti asāduṃ labhitvā sāduṃ pariyesanti . sītaṃ labhitvā uṇhaṃ pariyesanti uṇhaṃ labhitvā sītaṃ pariyesanti . te yaṃ yaṃ labhanti tena tena na tussanti aparāparaṃ pariyesanti [5]- rasesu ratā giddhā gadhitā mucchitā pajjhāyantā laggā laggitā palibuddhā. {781.1} Sā rasataṇhā tassa paccekasambuddhassa pahīnā ucchinnamūlā tālāvatthukatā anabhāvaṅgatā āyatiṃanuppādadhammā tasmā so paccekasambuddho paṭisaṅkhā yoniso āhāraṃ āhāreti neva davāya na madāya na maṇḍanāya na vibhūsanāya yāvadeva imassa kāyassa ṭhitiyā yāpanāya vihiṃsuparatiyā brahmacariyānuggahāya iti purāṇañca vedanaṃ paṭihaṅkhāmi navañca vedanaṃ na uppādessāmi yātrā ca me bhavissati anavajjatā ca phāsuvihāro cāti. Yathā vaṇaṃ ālimpeyya yāvadeva ropanatthāya yathā vā sattho akkhaṃ abbhañjeyya yāvadeva bhārassa nittharaṇatthāya yathā vā puttamaṃsaṃ [11]- Āhareyya yāvadeva kantārassa nitthaṇotthāya evameva so Paccekasambuddho paṭisaṅkhā yoniso āhāraṃ āhāreti neva davāya na madāya na maṇḍanāya na vibhūsanāya yāvadeva imassa kāyassa ṭhitiyā yāpanāya vihiṃsuparatiyā brahmacariyānuggahāya iti purāṇañca vedanaṃ paṭihaṅkhāmi navañca vedanaṃ na uppādessāmi yātrā ca me bhavissati anavajjatā ca phāsuvihāro cāti . rasataṇhāya ārato virato paṭivirato nikkhanto nissaṭṭho vippamutto visaṃyutto vimariyādikatena cetasā viharatīti rasesu gedhaṃ akaraṃ . aloloti lolāti vā loluppāti vā vuccati taṇhā yo rāgo sārāgo .pe. abhijjhā lobho akusalamūlaṃ . sā lolā loluppā taṇhā tassa paccekasambuddhassa pahīnā ucchinnamūlā tālāvatthukatā anabhāvaṅgatā āyatiṃanuppādadhammā tasmā paccekasambuddho aloloti rasesu gedhaṃ akaraṃ alolo.