[784] Pahāya pañcāvaraṇāni cetaso upakkilese byapanujja sabbe anissito chetvā snehadosaṃ eko care khaggavisāṇakappo.

[785] Pahāya pañcāvaraṇāni cetasoti so paccekasambuddho kāmacchandanīvaraṇaṃ pahāya pajahitvā vinodetvā byantīkaritvā Anabhāvaṅgametvā byāpādanīvaraṇaṃ thīnamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ pahāya pajahitvā vinodetvā byantīkaritvā anabhāvaṅgametvā vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharatīti pahāya pañcāvaraṇāni cetaso.

[786] Upakkilese byapanujja sabbeti rāgo cittassa upakkileso doso cittassa upakkileso moho cittassa upakkileso kodho upanāho .pe. sabbākusalābhisaṅkhārā cittassa upakkilesā . Upakkilese byapanujja sabbeti cittassa sabbe upakkilese byapanujja panūditvā pajahitvā vinodetvā byantīkaritvā anabhāvaṅgametvāti upakkilese byapanujja sabbe.

[787] Anissito chetvā snehadosanti anissitoti dve nissayā taṇhānissayo ca diṭṭhinissayo ca .pe. ayaṃ taṇhānissayo .pe. ayaṃ diṭṭhinissayo . snehoti dve snehā taṇhāsneho ca diṭṭhisneho ca .pe. ayaṃ taṇhāsneho .pe. ayaṃ diṭṭhisneho . dosoti yo cittassa āghāto paṭighāto paṭigho paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṃ doso dussanā dussitattaṃ byāpatti byāpajjanā byāpajjitattaṃ virodho paṭivirodho caṇḍikkaṃ assuropo anattamanatā Cittassa . anissito chetvā snehadosanti so paccekasambuddho taṇhāsnehañca diṭṭhisnehañca dosañca chetvā ucchetvā samucchetvā pajahitvā vinodetvā byantīkaritvā anabhāvaṅgametvā cakkhuṃ anissito sotaṃ anissito .pe. diṭṭhasutamutaviññātabbe dhamme anissito anallīno anupagato anajjhosito anadhimutto nikkhanto nissaṭṭho vippamutto visaññutto vimariyādikatena cetasā viharatīti anissito chetvā snehadosaṃ . Eko care khaggavisāṇakappo. Tenāha so paccekasambuddho pahāya pañcāvaraṇāni cetaso upakkilese byapanujja sabbe anissito chetvā snehadosaṃ eko care khaggavisāṇakappoti.