[788] Vipiṭṭhikatvāna sukhaṃ dukhañca pubbeva ca somanassadomanassaṃ laddhānupekkhaṃ samathaṃ visuddhaṃ eko care khaggavisāṇakappo.

[789] Vipiṭṭhikatvāna sukhaṃ dukhañca pubbeva ca somanassadomanassanti so paccekasambuddho sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharatīti vipiṭṭhikatvāna Sukhaṃ dukhañca pubbeva ca somanassadomanassaṃ.

[790] Laddhānupekkhaṃ samathaṃ visuddhanti upekkhāti yā catutthajjhāne upekkhā upekkhanā ajjhupekkhanā cittassa passaddhatā majjhattatā cittassa . samathoti yā cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṃ samādhibalaṃ sammāsamādhi . catutthajjhāne upekkhā ca samatho ca suddhā honti visuddhā pariyodātā anaṅgaṇā vigatūpakkilesā mudubhūtā kammanīyā ṭhitā āneñjappattā . laddhānupekkhaṃ samathaṃ visuddhanti catutthajjhāne upekkhañca samathañca laddhāna labhitvāti [4]- laddhānupekkhaṃ samathaṃ visuddhaṃ . eko care khaggavisāṇakappo . Tenāha so paccekasambuddho vipiṭṭhikatvāna sukhaṃ dukhañca pubbeva ca somanassadomanassaṃ laddhānupekkhaṃ samathaṃ visuddhaṃ eko care khaggavisāṇakappoti.

[791] Āraddhaviriyo paramatthapattiyā alīnacitto akusītavutti daḷhanikkamo thāmabalūpapanno eko care khaggavisāṇakappo.