[794] Daḷhanikkamo thāmabalūpapannoti daḷhanikkamoti so paccekasambuddho daḷhasamādāno ahosi kusalesu dhammesu avaṭṭhitasamādāno kāyasucarite vacīsucarite manosucarite dānasaṃvibhāge sīlasamādāne uposathupavāse metteyyatāya petteyyatāya sāmaññatāya brahmaññatāya kulejeṭṭhāpacāyikāya aññataraññataresu adhikusalesu dhammesūti daḷhanikkamo . thāmabalūpapannoti so paccekasambuddho thāmena ca balena ca viriyena ca parakkamena ca [2]- upeto hoti samupeto upāgato samupāgato upapanno samupapanno samannāgatoti daḷhanikkamo thāmabalūpapanno . eko care khaggavisāṇakappo . Tenāha so paccekasambuddho āraddhaviriyo paramatthapattiyā alīnacitto akusītavutti daḷhanikkamo thāmabalūpapanno eko care khaggavisāṇakappoti.

[795] Paṭisallānaṃ jhānamariñcamāno dhammesu niccaṃ anudhammacārī Ādīnavaṃ sammasitā bhavesu eko care khaggavisāṇakappo.

[796] Paṭisallānaṃ jhānamariñcamānoti so paccekasambuddho paṭisallānārāmo hoti paṭisallānarato ajjhattaṃ cetosamathamanuyutto anirākatajjhāno [1]- jhānamariñcati anuppannassa vā paṭhamassa jhānassa uppādāya yutto payutto saṃyutto āyutto samāyutto anuppannassa vā dutiyassa jhānassa anuppannassa vā tatiyassa jhānassa anuppannassa vā catutthassa jhānassa uppādāya yutto payutto saṃyutto āyutto samāyuttoti evaṃ jhānamariñcati . Athavā uppannaṃ vā paṭhamaṃ jhānaṃ āsevati bhāveti bahulīkaroti uppannaṃ vā dutiyaṃ jhānaṃ uppannaṃ vā tatiyaṃ jhānaṃ uppannaṃ vā catutthaṃ jhānaṃ āsevati bhāveti bahulīkarotīti evampi jhānamariñcatīti paṭisallānaṃ jhānamariñcamāno.

[797] Dhammesu niccaṃ anudhammacārīti dhammā vuccanti cattāro satipaṭṭhānā .pe. ariyo aṭṭhaṅgiko maggo . katame anudhammā . sammāpaṭipadā anulomapaṭipadā apaccanīkapaṭipadā anvatthapaṭipadā dhammānudhammapaṭipadā sīlesu paripūrikāritā indriyesu guttadvāratā bhojane mattaññutā jāgariyānuyogo satisampajaññaṃ ime vuccanti anudhammā . dhammesu niccaṃ anudhammacārīti dhammesu niccakālaṃ [4]- satataṃ samitaṃ abbokiṇṇaṃ pokhānupokhaṃ udakummijātaṃ Avici santati sahitaṃ phusitaṃ purebhattaṃ pacchābhattaṃ purimayāme majjhimayāme pacchimayāme kāḷe juṇhe vasse hemante gimhe purime vayokhandhe majjhime vayokhandhe pacchime vayokhandhe carati vicarati iriyati vatteti pāleti yapeti yāpetīti dhammesu niccaṃ anudhammacārī.