[84] Katthetaṃ uparujjhatīti katthetaṃ nirujjhati vūpasammati atthaṃ gacchati paṭippassambhatīti katthetaṃ uparujjhati . tenāha so brāhmaṇo paññā ceva sati cāpi (iccāyasmā ajito) nāmarūpañca mārisa etamme puṭṭho pabrūhi katthetaṃ uparujjhatīti.

[85] Yametaṃ pañhaṃ apucchi ajita taṃ vadāmi te yattha nāmañca rūpañca asesaṃ uparujjhati viññāṇassa nirodhena etthetaṃ uparujjhati.

[86] Yametaṃ pañhaṃ apucchīti yametanti paññañca satiñca nāmarūpañca . apucchīti āpucchasi āyācasi ajjhesasi pasādesīti yametaṃ pañhaṃ apucchi.

[87] Ajita taṃ vadāmi teti ajitāti bhagavā taṃ brāhmaṇaṃ nāmena ālapati . tanti paññañca satiñca nāmarūpañca . Vadāmīti taṃ vadāmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti ajita taṃ vadāmi te.