[798] Ādīnavaṃ sammasitā bhavesūti sabbe saṅkhārā aniccāti ādīnavaṃ sammasitā bhavesu sabbe saṅkhārā dukkhāti sabbe dhammā anattāti .pe. yaṅkiñci samudayadhammaṃ sabbantaṃ nirodhadhammanti ādīnavaṃ sammasitā bhavesūti ādīnavaṃ sammasitā bhavesu . Eko care khaggavisāṇakappo. Tenāha so paccekasambuddho paṭisallānaṃ jhānamariñcamāno dhammesu niccaṃ anudhammacārī ādīnavaṃ sammasitā bhavesu eko care khaggavisāṇakappoti.

[799] Taṇhakkhayaṃ patthayaṃ appamatto anelamūgo sutavā satimā saṅkhātadhammo niyato padhānavā eko care khaggavisāṇakappo.

[800] Taṇhakkhayaṃ patthayaṃ appamattoti taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā . Taṇhakkhayaṃ patthayanti rāgakkhayaṃ dosakkhayaṃ mohakkhayaṃ gatikkhayaṃ upapattikkhayaṃ paṭisandhikkhayaṃ bhavakkhayaṃ saṃsārakkhayaṃ vaṭṭakkhayaṃ icchanto patthayanto [1]- abhijappantoti taṇhakkhayaṃ patthayaṃ . appamattoti so paccekasambuddho sakkaccakārī sātaccakārī .pe. appamatto kusalesu dhammesūti taṇhakkhayaṃ patthayaṃ appamatto.

[801] Anelamūgo sutavā satimāti anelamūgoti so paccekasambuddho paṇḍito paññavā buddhimā ñāṇī vibhāvī medhāvīti anelamūgo . sutavāti so paccekasambuddho bahussuto hoti sutadharo sutasannicayo ye te dhammā ādikalyāṇā majjhekalyāṇā pariyosānakalyāṇā sātthā sabyañjanā kevalaparipuṇṇaṃ parisuddhaṃ brahmacariyaṃ abhivadanti tathārūpāssa dhammā bahussutā honti dhatā vacasā paricitā manasānupekkhitā diṭṭhiyā supaṭividdhāti sutavā . satimāti so paccekasambuddho satimā hoti paramena satinepakkena samannāgato cirakatampi cirabhāsitampi saritāti anelamūgo sutavā satimā.