[118] Atthi pañhena āgamanti pañhatthikamhā āgatā pañhaṃ pucchitukāmamhā āgatā pañhaṃ sotukāmā āgatamhāti evampi atthi pañhena āgamaṃ . athavā pañhatthikānaṃ pañhaṃ pucchitukāmānaṃ pañhaṃ sotukāmānaṃ āgamaṃ abhikkamanaṃ upasaṅkamanaṃ payirupāsanaṃ atthīti evampi atthi pañhena āgamaṃ . athavā pañhāgamo tuyhaṃ atthi tvampi pahu visavī alamatto mayā pucchituṃ kathetuṃ visajjetuṃ sandassetuṃ bhaṇitunti evampi atthi pañhena āgamaṃ.

[119] Kiṃnissitā isayo manujāti kiṃnissitāti kiṃ nissitā āsitā allīnā upagatā ajjhositā adhimuttā . isayoti isināmakā yekeci isipabbajjaṃ pabbajitā ājīvakā nigganthā jaṭilā tāpasā. Manujāti manussā vuccantīti kiṃnissitā isayo manujā.

[120] Khattiyā brāhmaṇā devatānanti khattiyāti yekeci khattiyajātikā . brāhmaṇāti yekeci bhovādikā . devatānanti ājīvakasāvakānaṃ ājīvakā devatā nigganthasāvakānaṃ nigganthā devatā jaṭilasāvakānaṃ jaṭilā devatā paribbājakasāvakānaṃ paribbājakā devatā avaruddhakasāvakānaṃ avaruddhakā devatā hatthivatikānaṃ hatthī devatā assavatikānaṃ assā devatā govatikānaṃ gāvo devatā kukkuravatikānaṃ kukkurā devatā kākavatikānaṃ kākā devatā vāsudevavatikānaṃ vāsudevo devatā baladevavatikānaṃ Baladevo devatā puṇṇabhaddavatikānaṃ puṇṇabhaddo devatā maṇibhaddavatikānaṃ maṇibhaddo devatā aggivatikānaṃ aggi devatā nāgavatikānaṃ nāgā devatā supaṇṇavatikānaṃ supaṇṇā devatā yakkhavatikānaṃ yakkhā devatā asuravatikānaṃ asurā devatā gandhabbavatikānaṃ gandhabbā devatā mahārājavatikānaṃ mahārājā devatā candavatikānaṃ cando devatā suriyavatikānaṃ suriyo devatā indavatikānaṃ indo devatā brahmavatikānaṃ brahmā devatā devavatikānaṃ devā devatā disāvatikānaṃ disā devatā ye yesaṃ dakkhiṇeyyā te tesaṃ devatāti khattiyā brāhmaṇā devatānaṃ.