[123] Yekecime isayo manujā (puṇṇakāti bhagavā) khattiyā brāhmaṇā devatānaṃ yaññamakappiṃsu puthūdha loke āsiṃsamānā puṇṇaka itthataṃ jaraṃ sitā yaññamakappayiṃsu.

[124] Yekecime isayo manujāti yekecimeti sabbena sabbaṃ sabbathā sabbaṃ asesaṃ nissesaṃ pariyādāyavacanametaṃ yekecimeti . Isayoti isināmakā yekeci isipabbajjaṃ pabbajitā ājīvakā Nigganthā jaṭilā tāpasā . manujāti manussā vuccantīti yekecime isayo manujā . puṇṇakāti bhagavā taṃ brāhmaṇaṃ nāmena ālapati . bhagavāti gāravādhivacanametaṃ .pe. sacchikā paññatti yadidaṃ bhagavāti puṇṇakāti bhagavā.

[125] Khattiyā brāhmaṇā devatānanti khattiyāti yekeci khattiyajātikā . brāhmaṇāti yekeci bhovādikā . devatānanti ājīvakasāvakānaṃ ājīvakā devatā .pe. disāvatikānaṃ disā devatā ye yesaṃ dakkhiṇeyyā te tesaṃ devatāti khattiyā brāhmaṇā devatānaṃ.

[126] Yaññamakappiṃsu puthūdha loketi yañño vuccati deyyadhammo cīvarapiṇḍapātasenāsanagilānapaccayabhesajjaparikkhāraṃ annaṃ pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ . Yaññamakappiṃsūti yepi yaññaṃ esanti gavesanti pariyesanti cīvarapiṇḍapātasenāsanagilānapaccayabhesajjaparikkhāraṃ annaṃ pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ tepi yaññaṃ kappenti . puthūti yaññā vā ete puthū yaññayajakā vā ete puthū dakkhiṇeyyā vā ete puthū . kathaṃ yaññā vā ete puthū .pe. Evaṃ dakkhiṇeyyā vā ete puthū . idha loketi manussaloketi yaññamakappiṃsu puthūdha loke.