[154] Upadhinidānā pabhavanti dukkhāti upadhīti dasa upadhī taṇhūpadhi diṭṭhūpadhi kilesūpadhi kammūpadhi duccaritūpadhi āhārūpadhi paṭighūpadhi catasso upādinnadhātuyo upadhī cha ajjhattikāni āyatanāni upadhī cha viññāṇakāyā upadhī sabbaṃpi dukkhaṃ dukkhaṭṭhena upadhi Ime vuccanti dasa upadhī . dukkhāti jātidukkhaṃ jarādukkhaṃ byādhidukkhaṃ maraṇadukkhaṃ sokaparidevadukkhadomanassupāyāsadukkhaṃ .pe. Byādhinā abhibhūtaṃ maraṇena abbhāhataṃ dukkhe patiṭṭhitaṃ atāṇaṃ aleṇaṃ asaraṇaṃ asaraṇībhūtaṃ ime vuccanti dukkhā . ime dukkhā upadhinidānā upadhihetukā upadhipaccayā upadhikāraṇā honti sambhavanti pabhavanti jāyanti sañjāyanti nibbattanti pātubhavantīti upadhinidānā pabhavanti dukkhā.

[155] Yekeci lokasmiṃ anekarūpāti yekecīti sabbena sabbaṃ sabbathā sabbaṃ asesaṃ nissesaṃ pariyādāyavacanametaṃ yekecīti . Lokasminti apāyaloke manussaloke devaloke khandhaloke dhātuloke āyatanaloke . anekarūpāti anekavidhā nānappakārā dukkhāti yekeci lokasmiṃ anekarūpā. Tenāha bhagavā dukkhassa ve maṃ pabhavaṃ apucchasi (mettagūti bhagavā) tante pavakkhāmi yathā pajānaṃ upadhinidānā pabhavanti dukkhā yekeci lokasmiṃ anekarūpāti.

[156] Yo ve avidvā upadhiṃ karoti punappunaṃ dukkhamupeti mando tasmā pajānaṃ upadhiṃ na kayirā dukkhassa jātippabhavānupassī.

[157] Yo ve avidvā upadhiṃ karotīti yoti yo yādiso yathāyutto yathāvihito yathāpakāro yaṃṭhānappatto yaṃdhammasamannāgato khattiyo vā brāhmaṇo vā vesso vā suddo vā gahaṭṭho vā pabbajito vā devo vā manusso vā . avidvāti avidvā avijjāgato añāṇī avibhāvī duppañño . upadhiṃ karotīti taṇhūpadhiṃ karoti diṭṭhūpadhiṃ karoti kilesūpadhiṃ karoti kammūpadhiṃ karoti duccaritūpadhiṃ karoti āhārūpadhiṃ karoti paṭighūpadhiṃ karoti catasso upādinnadhātuyo upadhī karoti cha ajjhattikāni āyatanāni upadhī karoti cha viññāṇakāye upadhī karoti janeti sañjaneti nibbattetīti avidvā upadhiṃ karoti.