[165] Tathā hi te vidito esa dhammoti tathā hi te vidito ñāto tulito tīrito vibhāvito vibhūto esa dhammoti tathā hi te vidito esa dhammo. Tenāha so brāhmaṇo yantaṃ apucchimha akittayī no aññaṃ taṃ pucchāma tadiṅgha brūhi kathaṃ nu dhīrā vitaranti oghaṃ jātijjaraṃ sokapariddavañca tamme munī sādhu viyākarohi tathā hi te vidito esa dhammoti.

[166] Kittayissāmi te dhammaṃ (mettagūti bhagavā) diṭṭhe dhamme anītihaṃ yaṃ viditvā sato caraṃ tare loke visattikaṃ.

[167] Kittayissāmi te dhammanti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ cattāro satipaṭṭhāne cattāro sammappadhāne cattāro Iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ nibbānañca nibbānagāminiñca paṭipadaṃ kittayissāmi [1]- desissāmi paññapessāmi paṭṭhapessāmi vivarissāmi vibhajissāmi uttānīkarissāmi pakāsissāmīti kittayissāmi te dhammaṃ . mettagūti bhagavā taṃ brāhmaṇaṃ nāmena ālapati.

[168] Diṭṭhe dhamme anītihanti diṭṭhe dhammeti diṭṭhe dhamme ñāte dhamme tulite dhamme tīrite dhamme vibhāvite dhamme vibhūte dhamme sabbe saṅkhārā aniccāti .pe. yaṅkiñci samudayadhammaṃ sabbantaṃ nirodhadhammanti diṭṭhe dhamme ñāte dhamme tulite dhamme tīrite dhamme vibhāvite dhamme vibhūte dhammeti evampi diṭṭhe dhamme kathayissāmi . athavā dukkhe diṭṭhe dukkhaṃ kathayissāmi samudaye diṭṭhe samudayaṃ kathayissāmi magge diṭṭhe maggaṃ kathayissāmi nirodhe diṭṭhe nirodhaṃ kathayissāmīti evampi diṭṭhe dhamme kathayissāmi . athavā diṭṭhe dhamme sandiṭṭhikaṃ akālikaṃ ehipassikaṃ opanayikaṃ paccattaṃ veditabbaṃ viññūhīti evampi diṭṭhe dhamme kathayissāmīti diṭṭhe dhamme . anītihanti na itihaṃ na itikirāya na paramparāya na piṭakasampadāya na takkahetu na nayahetu na ākāraparivitakkena na diṭṭhinijjhānakkhantiyā sāmaṃ sayamabhiññātaṃ attapaccakkhaṃ dhammaṃ kathayissāmīti diṭṭhe dhamme anītihaṃ.