[185] Etābhinandāmi vaco mahesinoti etanti tuyhaṃ vacanaṃ byapathaṃ desanaṃ anusandhiṃ . abhinandāmīti nandāmi abhinandāmi modāmi anumodāmi icchāmi sādiyāmi yācāmi patthayāmi pihayāmi abhijappāmi . mahesinoti bhagavā mahantaṃ sīlakkhandhaṃ esi gavesi pariyesīti mahesī .pe. kahaṃ narāsabhoti mahesīti etābhinandāmi vaco mahesino.

[186] Sukittitaṃ gotama nūpadhīkanti sukittitanti sukittitaṃ suācikkhitaṃ sudesitaṃ supaññapitaṃ supaṭṭhapitaṃ suvivaritaṃ suvibhajitaṃ suuttānīkataṃ supakāsitanti sukittitaṃ . gotama nūpadhīkanti upadhi vuccanti kilesā ca khandhā ca abhisaṅkhārā ca . upadhipahānaṃ upadhivūpasamaṃ upadhipaṭinissaggaṃ upadhipaṭippassaddhiṃ amataṃ nibbānanti sukittitaṃ gotama nūpadhīkaṃ.

[187] Addhā hi bhagavā pahāsi dukkhanti addhāti ekaṃsavacanaṃ nissaṃsayavacanaṃ nikkaṅkhāvacanaṃ advejjhavacanaṃ adveḷhakavacanaṃ niyyānavacanaṃ apaṇṇakavacanaṃ avatthānavacanametaṃ addhāti . Bhagavāti gāravādhivacanametaṃ .pe. sacchikā paññatti yadidaṃ bhagavāti . Pahāsi dukkhanti jātidukkhaṃ jarādukkhaṃ byādhidukkhaṃ maraṇadukkhaṃ sokaparidevadukkhadomanassupāyāsadukkhaṃ pahāsi pajahi vinodesi byantīkarosi anabhāvaṅgamesīti addhā hi bhagavā pahāsi dukkhaṃ.

[188] Tathā hi te vidito esa dhammoti tathā hi te vidito ñāto tulito tīrito vibhāvito vibhūto esa dhammoti tathā hi te vidito esa dhammo. Tenāha so brāhmaṇo etābhinandāmi vaco mahesino sukittitaṃ gotama nūpadhīkaṃ addhā hi bhagavā pahāsi dukkhaṃ tathā hi te vidito esa dhammoti.