[260] Saññāvimokkhe paramedhimuttoti saññāvimokkhā vuccanti Satta saññāsamāpattiyo . tāsaṃ saññāsamāpattīnaṃ ākiñcaññāyatanasamāpatti vimokkhā aggā ca seṭṭhā ca viseṭṭhā ca pāmokkhā ca uttamā ca pavarā ca. Parame agge seṭṭhe viseṭṭhe pāmokkhe uttame pavare adhimuttivimokkhena adhimutto tatrādhimutto tadadhimutto taccarito tabbahulo taggaruko tanninno tappoṇo tappabbhāro tadādhipateyyoti saññāvimokkhe paramedhimutto.

[261] Tiṭṭheyya so tattha anānuyāyīti tiṭṭheyyāti tiṭṭheyya saṭṭhīkappasahassāni . tatthāti ākiñcaññāyatane . anānuyāyīti anānuyāyī avedhamāno avigacchamāno anantaradhāyamāno aparihiyamāno. Athavā arajjamāno adussamāno amuyhamāno akiliyamānoti tiṭṭheyya so tattha anānuyāyī. Tenāha bhagavā sabbesu kāmesu yo vītarāgo (upasīvāti bhagavā) ākiñcaññaṃ nissito hitvamaññaṃ saññāvimokkhe paramedhimutto tiṭṭheyya so tattha anānuyāyīti.

[262] Tiṭṭhe ce so tattha anānuyāyī pūgampi vassānaṃ samantacakkhu tattheva so sītisiyā vimutto Bhavetha viññāṇaṃ tathāvidhassa.

[263] Tiṭṭhe ce so tattha anānuyāyīti tiṭṭhe ce soti sace so tiṭṭheyya saṭṭhīkappasahassāni . tatthāti ākiñcaññāyatane . Anānuyāyīti anānuyāyī avedhamāno avigacchamāno anantaradhāyamāno aparihiyamāno athavā arajjamāno adussamāno amuyhamāno akiliyamānoti tiṭṭhe ce so tattha anānuyāyī.