[314] Nāhaṃ sabbe samaṇabrāhmaṇā se (nandāti bhagavā) jātijarāya nivutāti brūmīti nāhaṃ nanda sabbe samaṇabrāhmaṇā jātijarāya āvutā nivutā ophuṭā pihitā paṭicchannā paṭikujjitāti vadāmi atthi te samaṇabrāhmaṇā yesaṃ jāti ca jarāmaraṇañca pahīnā ucchinnamūlā tālāvatthukatā anabhāvaṅgatā āyatiṃ anuppādadhammāti brūmi ācikkhāmi desemi paññapemi paṭṭhapemi Vivarāmi vibhajāmi uttānīkaromīti nāhaṃ sabbe samaṇabrāhmaṇā se (nandāti bhagavā) jātijarāya nivutāti brūmi.

[315] Yesīdha diṭṭhaṃva sutaṃ mutaṃ vā sīlabbataṃ vāpi pahāya sabbanti ye sabbā diṭṭhasuddhiyo pahāya [1]- pajahitvā vinodetvā byantīkaritvā anabhāvaṅgametvā ye sabbā sutasuddhiyo ye sabbā diṭṭhasutasuddhiyo ye sabbā mutasuddhiyo ye sabbā sīlasuddhiyo ye sabbā vattasuddhiyo ye sabbā sīlabbattasuddhiyo pahāya pajahitvā vinodetvā byantīkaritvā anabhāvaṅgametvāti yesīdha diṭṭhaṃva sutaṃ mutaṃ vā sīlabbataṃ vāpi pahāya sabbaṃ.

[316] Anekarūpampi pahāya sabbanti anekavidhavattakutūhalamaṅgalena suddhiṃ visuddhiṃ parisuddhiṃ muttiṃ vimuttiṃ parimuttiṃ pahāya pajahitvā vinodetvā byantīkaritvā anabhāvaṅgametvāti anekarūpampi pahāya sabbaṃ.

[317] Taṇhaṃ pariññāya anāsavā ye te ve narā oghatiṇṇāti brūmīti taṇhanti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā . pariññāyāti taṇhaṃ tīhi pariññāhi parijānitvā ñātapariññāya tīraṇapariññāya pahānapariññāya. {317.1} Katamā ñātapariññā . taṇhaṃ pajānāti ayaṃ rūpataṇhā ayaṃ saddataṇhā ayaṃ gandhataṇhā ayaṃ rasataṇhā ayaṃ phoṭṭhabbataṇhā Ayaṃ dhammataṇhāti pajānāti passati ayaṃ ñātapariññā. {317.2} Katamā tīraṇapariññā . evaṃ ñātaṃ katvā taṇhaṃ tīreti aniccato dukkhato rogato gaṇḍato .pe. anissaraṇato tīreti ayaṃ tīraṇapariññā. {317.3} Katamā pahānapariññā . evaṃ tīretvā taṇhaṃ pajahati vinodeti byantīkaroti anabhāvaṅgameti . vuttaṃ hetaṃ bhagavatā yo bhikkhave taṇhāya chandarāgo taṃ pajahatha evaṃ sā taṇhā pahīnā bhavissati ucchinnamūlā tālāvatthukatā anabhāvaṅgatā āyatiṃ anuppādadhammāti . ayaṃ pahānapariññā . taṇhaṃ imāhi tīhi pariññāhi parijānitvāti taṇhaṃ pariññāya. {317.4} Anāsavāti cattāro āsavā kāmāsavo bhavāsavo diṭṭhāsavo avijjāsavo yesaṃ ime āsavā pahīnā ucchinnamūlā tālāvatthukatā anabhāvaṅgatā āyatiṃ anuppādadhammā te vuccanti anāsavā . Yeti arahanto khīṇāsavā. {317.5} Taṇhaṃ pariññāya anāsavā ye te ve narā oghatiṇṇāti brūmīti ye taṇhaṃ pariññāya anāsavā te kāmoghaṃ tiṇṇā bhavoghaṃ tiṇṇā diṭṭhoghaṃ tiṇṇā avijjoghaṃ tiṇṇā sabbaṃ saṃsārapathaṃ tiṇṇā uttiṇṇā nittiṇṇā atikkantā samatikkantā vītivattāti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti taṇhaṃ pariññāya Anāsavā ye te ve narā oghatiṇṇāti brūmi. Tenāha bhagavā nāhaṃ sabbe samaṇabrāhmaṇā se (nandāti bhagavā) jātijarāya nivutāti brūmi yesīdha diṭṭhaṃva sutaṃ mutaṃ vā sīlabbataṃ vāpi pahāya sabbaṃ anekarūpampi pahāya sabbaṃ taṇhaṃ pariññāya anāsavā ye te ve narā oghatiṇṇāti brūmīti.